1 TIMOTEO 4 - Nuevo Testamento en Quichua Cañar 1996

“Pandata yachachiccuna tiyangami” nishcamanta

¹ Chashna cacpipish q'uipa punzhacunapi ima tucuna cashcataca, allimi Diospac Espirituca huillacun. Chai punzhacunapica maijancunaca llullac espiritucuna ima nishcata cazushpa, supaicuna yachachishcatapish c'atishcamantami, crishcatapish saquishpa ña mana c'atishun ningacuna.

² Chashna yachachiccunaca mishqui shimi, jayac shungu llullaccunami. Shinallatac paicunapac shungupi diablo unanchishcamantaca, ima allita ruhuana yuyaitapish mana charincunachu. Paicuna nishcatami gentecunaca uyancuna.

³ Chai yachachiccunaca cazaranapish, maijan micunata micunapish mana allichu nincunami. Ashtahuanpish Taita Diosca cashcata yachac criccunamanca paita pagui nishpa micuchunmi, chaicunataca ruhuarca.

⁴ Taita Dios ruhuashcacunaca, tucuimi alli. Chaimantami Diosta pagui nishpa, imatapish mana millashpa chasquinalla canchic.

⁵ Dios rimashca shimimantapish shinallatac Diosman mañashcamantapish, imapish Diospacllami tucun.

Jesucristopactaca allita ruhuana cashcamanta

⁶ Cai rimashcacunata criccunaman yachachishpa, shinallatac crinata yachachic shimicunatapish, can c'aticushca alli yachanacunatapish micunata micuc shina yachacushpaca, Jesucristopacta allita ruhuacmi cangui.

⁷ Imapish yanga parlocunataca ama uyanguichu. Chaipac randica cuerpota pucllangapac allichiric shina, Taita Diospac ñaupapi alli causana yuyailla cangui.

⁸ Cuerpo sinchiyachun pucllanaca, ashacamanca allimi. Ashtahuanpish Taita Dioshuan alli canami tucuimanta yalli allica. Cai causaipacpish, q'uipa causaipacpish allicunatami apamun.

⁹ Cai ñuca rimashcaca chashnatac cashcamantami, tucui mashna crina canchic.

¹⁰ Ñucanchicca causac Diospimi shunguta churashcanchic. Paica tucui cai pachapi causaccunata Quishpichicmi. Ashtahuancarin paita criccunatami quishpichin. Chaimantami maijancuna p'iñacpipish, llaquita apashpa paipactaca ruhuashpa c'aticunchic.

¹¹ Cai ñuca nishcacunataca cazuchun nishpa yachachingui.

¹² Criccuna canta ricushpa allita causachunca, allita ruhuashpa, alli shimicunata rimashpa, alli c'uyac, alli cric, shinallatac ima mapa yuyaicuna illacmi cana cangui. Pacta cantaca “huambraracmi” nishpa rimanmancuna.

¹³ Ñuca shamungacamanca, Dios rimashca shimita criccunaman rizashpa, yachachishpa cunangui.

¹⁴ Criccunata pushaccuna cambac uma jahuapi maquita churashpa mañacpica, Dios imata ruhuachun cushcata pacta cungaringuiman. Paicunaca Taita Dios yuyaita cucpimi, chashnaca ruhuarcacuna.

¹⁵ Diospacta ruhuashpa alli c'aticushcata tucui mashna ricuchunca, cai ñuca nishcacunapi tucui yuyaita churangui.

¹⁶ Can ima shina yachachicushcamanta, shinallatac ima shina causacushcamantapish alli cuidaringui. Chashna ruhuacushpaca canpish quishpiringuimi, shinallatac can huillashcata uyaccunapish quishpiringacunami.