1 TIMOTEO 2 - Nuevo Testamento en Quichua Cañar 1996

Ima shina Taita Diosman mañanamanta

¹ Tucuimanta yallica cancuna Taita Diosman mañacushpaca, imamantapish pagui nishpa, tucui gentecunamanta mañachunmi munani.

² Tucui ñucanchic sumacta apanacushpa causangapacca, jatun mandaccunamantapish shinallatac llactata mandaccunamantapish Taita Diosman mañashpami causachun munani. Shina mañashpami Diosta cazushpa, imapipish alli nishca cashun.

³ Chashna mañashpami allita ruhuanchic, shinallatac ñucanchicta Quishpichic Taita Diostapish cushichinchic.

⁴ Paica quishpirinamanta alli huillaica chashnatac cashcata yachac chayashpa, tucui gentecuna quishpirichunmi munan.

⁵ Shuclla Diosmi tiyan. Shinallatac Taita Dioshuan gentecunahuan alli tucuchicpish, shucllami tiyan. Paica runa tucungapac shamushca Jesucristomi.

⁶ Tucui gentecunata quishpichingaraicumi, paillatac japi tucushpa huañurca. Chashna huañushpami, Taita Dios munashca punzhacuna pactacpica, Dios quishpichic cashcata ricuchirca.

⁷ Tucui caicunata mana israelcunaman*f** huillashpa yachachichunmi, Jesusca ñucataca acllarca. Paicunamanca cashcata nic alli huillaita crichun nishpami yachachini. Ñucaca mana llullashpami, chashnatac cashcata nini.

⁸ Jesusta cric c'aricunaca, maipi cashpapish mana p'iñarishpa, imatapish mana rimanacushpa, jahuaman maquita chutashpa alli shunguhuan Taita Diosman mañachunmi munani.

⁹ Shinallatac huarmicuna churarishpapish, churana caipacllatac churarishpa, curimanta, perlasmanta ruhuashcacunahuanpish, yallita valic churanacunahuanpish ama allichirichunmi munani. Umata huatallishpapish, ama yallita allichirichun ninimi.

¹⁰ Chaipac randica Diosta cazuc huarmicuna ruhuana cashca shina, imapish allicunallata ruhuachun ninimi.

¹¹ Huarmicunaca yachachiccunata cazushpa, upalla uyashpa yachacuchun ninimi.

¹² Huarmicunaca c'aricunata mandashpa, tandanacuipi yachachichunca mana munanichu, ashtahuanpish upalla cachunmi munani.

¹³ Taita Diosca Adantaracmi ruhuarca. Q'uipatami Evataca ruhuarca.

¹⁴ Shinallatac mana Adanchu diablo pandachishcaca carca, ashtahuanpish Evami diablo pandachicpi, Dios mandashcata mana cazushpa juchapi urmarca.

¹⁵ Shina cashpapish huarmicunaca huahuacunata charishpa, alli cric cashpa, c'uyashpa, Diospaclla alli yuyaihuan causashpaca quishpiringami.