1 TIMOTEO 1 - Nuevo Testamento en Quichua Cañar 1996

Timoteoman Pablo quillcashcamanta

¹ Ñucanchicta Quishpichic Taita Dios, shinallatac Apunchic Jesucristo mandashcamanta, ñucanchic crishpa shunguta churashca Apunchic Jesucristo acllashca huillac Pablomi,

² Jesusta crishcamanta ñucapac quiquin huahua shina cac Timoteoman caita quillcashpa cachani. Ñucanchic Taita Diospish, Apunchic Jesucristopish sumaimana c'uyaihuan llaquishpa, canman sumac causaita cushca cachun nishpami quillcani.

Pandata yachachiccunata mana crina cashcamanta

³ Macedonia llactaman rishpa ñuca nishca shinallatac, Efeso pueblopi saquirishpa, canca chaipi pandata yachachiccuna ama yachachishpa, shinallatac chai yachanacunataca

⁴ yachacushpallapish ama c'atichun nishpa jarcangui. Chai yachanacunaca yanga parlocuna, shinallatac mana yupaipac ñaupa taitacunapac shuticunallami. Tucui chaicunaca p'iñanacuillapi churashpami, maijanpish Jesusta cricpi, Taita Dios quishpichisha nicushca crinataca jarcan.

⁵ Caita mandashpaca, shungupi mana mapa yuyaihuan, pipish mana juchanchishca, mana nic tucushpalla crishpa, caishuc chaishuchuan c'uyanacuchunmi nini.

⁶ Maijancunaca cai allicunata saquishpami, yangalla parlocunata parlangapac chingarishcacuna.

⁷ Paicunaca imata nicushcatapish, “caica cashnami” nishpa yachachicushcatapish mana entendinchu. Shina cashca jahuami, paicunaca Taita Dios mandashcacunata yachachic canata munancuna.

⁸ Mandashcapi ima nicushcata allita yachashpa yachachicpica, mandashcacunaca alli cashcatami yachanchic.

⁹ Mandashcacunataca Taita Diosca cashcata ruhuaccunata llaquichichunca mana curcachu, ashtahuanpish p'iñaccunata, mana cazuccunata, imapish mana allita ruhuaccunata, juchalliccunata, Taita Diosta burlaccunata shinallatac paita cricpipish asiccunata, taita mamata huañuchiccunata, pitapish huañuchiccunata,

¹⁰ manapish quiquin huarmihuan, manapish quiquin cusahuan chayariccunata, c'aripurallatac huarmipurallatac chayarishpa causaccunata, genteta shuhuaccunata, llullaccunata, llullashpapish mana llullanichu niccunata, shinallatac tucui alli yachachishcacunata mana cazuccunata llaquichichunmi, Taita Diosca mandashcacunataca curca.

¹¹ Cashnaca quishpirinamanta sumac alli huillaimi yachachin. Chaita huillachunmi, tucui mashna alli nina Taita Dios ñucaman mingarca.

Taita Dios llaquishcata yuyarishpa, Pablo pagui nishcamanta

¹² Alli crishpa c'atichun ñucata sinchiyachishcamanta, shinallatac ñuca paita cazuc cashcata yachashpa paita servichun churashcamantami, ñucanchic Apunchic Jesucristotaca pagui nicunilla.

¹³ Ñaupaca criccunata llaquichishpa, Jesusta p'iñashpa c'amicmi carcani. Shina cacpipish manarac cric cashpa, imata ruhuacushcata mana yachashcamantami, Taita Diosca ñucata llaquirca.

¹⁴ Chashnami ñucanchic Apunchic Jesucristohuan shuc shinalla tucucpica, c'uyaitapish, crina yuyaitapish, ñucata yallita c'uyashcamanta Apunchic Jesucristoca curca.

¹⁵ Jesucristoca juchayuccunata quishpichingapacca cai pachamanmi shamurca. Chaica chashnatac cashcamantami tucui mashna crina canchic. Juchayuccunamanta nishpaca, ñucami yallita juchayucca cani.

¹⁶ Jesucristo punzhanta llaquic cashcata ricuchunmi, yallita ñuca juchayuc cacpipish, Taita Diosca ñucata llaquirca. Chashnaca maijanpish mashna juchayuc cashpapish, Jesusta crishpaca huiñai causaita japinalla cashcata ricuchingapacmi, ñucataca acllarca.

¹⁷ ¡Chaimanta huiñaita causacuc Jatun Mandac, jaicapi mana chingaric, pipish mana ricushca, shuclla Taita Diostaca, huiñai huiñaita “allimari cangui, sumacmari cangui” nishunchicyari! Chashna cachun.

¹⁸ C'uyashca ñuca huahua shina Timoteo, utcaman Diosmanta huillaccuna canmanta huillashca shinallatacmi, alli soldado shina Taita Diospacta ruhuachun nishpa canmanca cai mandashcata mingani:

¹⁹ Cambac yuyai ama juchanchishca cachunca, alli crishpa c'atingui. Maijancunaca quiquin yuyaipi mana jarcarishpami, yacupi aguaric shina crishcata saquishpa, llaqui tucushcacuna.

²⁰ Chashnami Himeneopish, Alejandropish tucushca. Paicuna Taita Diosta ama c'amishpa c'atichun nishpami, Satanasman*f** llaquichichun curcani.