1 TESALONICENSES 5 - Nuevo Testamento en Quichua Cañar 1996

¹ C'uyashca criccuna, Apunchic Jesús ima huata, ima punzha cutimuna cashcataca, mana quillcanachu cani.

² Cancunallatac Apunchic Jesús shuc shuhua tuta shamuc shina, mana yuyashca horas cutimuna cashcataca, allimi yachanguichic.

³ Gentecunaca: “Alli sumactami causacunchic” nicucpica, jatun llaquica huicsa junda huarmita huachana nanai japic shinami cungailla japinga. Chai jatun llaquimantaca pipish mana quishpiringachu.

⁴ Ashtahuanpish c'uyashca criccuna, cancunaca mana amsapi shinachu canguichic. Chashna cashcamanta Apunchic Jesús shuhua shina cungailla cutimushpapish, mana cungailla manchachingachu.

⁵ Tucui cancunami achiclla punzhapi shina canguichic. Mana amsapi, mana tutapi shinachu causacunchic.

⁶ Chashna cashcamantami caishuccuna suiñucuc shinaca ña mana causana canchic, ashtahuanpish ñucanchicca alli yuyaihuanmi riccharishca shina causana canchic.

⁷ Maijanpish suiñucca tutami suiñun. Shinallatac maijanpish machacca tutami machan.

⁸ Ashtahuanpish ñucanchicca punzhapi shina causacushcamantaca, alli yuyaihuanmi c'atina canchic. Fierro churanata churaric shinaca, Apunchic Jesusta crishpa, c'uyaihuan causanami canchic. Chashnallatac umapi fierro cascota churaric shinaca, quishpirina yuyaihuanmi cushicushpa shuyana canchic.

⁹ Ñucanchictaca Taita Diosca p'iñarishpa, llaquichingapacca mana acllarcachu. Chaipac randica, ñucanchic Apunchic Jesusmanta quishpirichunmi acllarca.

¹⁰ Causacushpapish, huañushpapish paihuan pacta cachunmi, Jesucristoca ñucanchicmanta huañurca.

¹¹ Chashna cashcamanta ima shinami cunan cancuna c'aticuc shinallatac, caishuc chaishuchuan alli c'atina yuyaita cunacushpa, ayudanacushpa causaichic.

Criccunata Pablo cunashcamanta

¹² C'uyashca criccuna, cancunapurapi Apunchic Jesuspacta ruhuashpa, cunashpa yachachiccunataca alli cazuichic nishpami mañanchic.

¹³ Paicuna allita ruhuacushcamantaca, c'uyashpa alli ninami canguichic. Shinallatac caishuc chaishuchuanmi alli sumacta causana canguichic.

¹⁴ Shinallatac c'uyashca criccuna, chai imata mana ruhuasha nic q'uillacunatapish rimaichic, llaquilla caccunatapish cushichichic, manarac sinchi criccunatapish yachachichic. Shinallatac tucuihuan mana p'iñarishpa, alli shungu caichic.

¹⁵ Shuccuna ima mana allita ruhuacpipish, paicunatapish chashnallatac ruhuanamantaca huacaichirichic. Chaipac randica punzhanta cancunapurapipish, tucui gentecunahuanpish allita ruhuanata munaichic.

¹⁶ Punzhanta cushilla caichic.

¹⁷ Taita Diosman mañanataca ama saquichicchu.

¹⁸ Tucui imamantapish Diostaca pagui nicuichiclla. Jesucristota criccunataca chashna ruhuachunmi, Taita Diosca munan.

¹⁹ Diospac Espíritu imata ruhuachun yuyaita cucpica, ninata huañuchic shina pacta mana ruhuashun ninguichicman.

²⁰ Dios ima nicushcata Diosllatac huillana yuyaita cucpica, pacta mana uyashun ninguichicman.

²¹ Alli cashcata, mana alli cashcataca alli yuyarichic. Alli cashcataca yuyarirashca, huacaichishpa causaichic.

²² Tucui laya mana allicunamanta anchurichic.

²³ Sumac causaita cuc Diosllatac cancunapac espiritutapish, almatapish, cuerpotapish Apunchic Jesús cutimuna punzhapacca paipaclla, pi mana juchanchipacta ruhuashpa huacaichichun.

²⁴ Cancunata acllac Diosca imatapish pactachic cashcamantami, tucui caicunatapish pactachinga.

Ña tucuchingapac “allilla cashca cachun” nishcamanta

²⁵ C'uyashca criccuna, ñucanchicmantapish Taita Diosman mañaichic.

²⁶ Tucui criccunata chuya shunguhuan muchashpa, caishuc chaishuc “allilla cashca cachun” ninacuichic.

²⁷ Apunchic Jesuspac shutipimi, cai quillcataca tucui criccunapac ñaupapi rizashpa huillachun nini.

²⁸ Ñucanchic Apunchic Jesucristoca tucui cancunaman paipac sumaimana c'uyaita cushca cachun.