1 TESALONICENSES 4 - Nuevo Testamento en Quichua Cañar 1996

Taita Dios munashca shina causanamanta

¹ C'uyashca criccuna, ima shinami ñucanchicmanta Taita Dios munashca shina causanata yachacushpa ña causacunguichic, chashnallatac punzhanta Taita Dios munashca shina causachun mañashpami, Apunchic Jesuspac shutipi cancunamanca minganchic.

² Apunchic Jesús mandashcamanta ñucanchic cancunaman imalla ruhuachun yachachishcataca, cancunallatac ña yachanguichicmi.

³ Taita Diosca paipaclla causashpa, pipish ama huacllirishpa,

⁴ tucui mashna quiquin huarmillahuan causashpa, ima mapa yuyaicunamanta anchurishpa, sumacta causachunmi munan.

⁵ Diosta mana cazuccuna shina mapa yuyaicunahuan, mana alli munaicunallahuan ama causaichicchu ninmi.

⁶ Chaimanta pacta chashna mana allita ruhuashpa, maijan huauquita umashpa mana allita ruhuanguichicman. Chashna ruhuaccunataca tucui mashnatami Apunchic Jesusca yallita llaquichinga.

⁷ Taita Diosca millaita ruhuashpa causachunca mana acllarcachu, ashtahuanpish paipaclla causachunmi acllarca.

⁸ Chashna cashcamanta pipish cai yachachishcacunata mana chasquicca, mana runallatachu mana chasquin, ashtahuanpish cancunaman paipac Espirituta cuc Taita Diostami mana chasquin.

⁹ Criccunapura c'uyanacuchun nishpaca, ña mana quillcanachu cani, ashtahuanpish Taita Diosllatacmi caishuc-huan chaishuchuan ima shina c'uyanacunataca ña yachachishca.

¹⁰ Macedonia llactapi causac tucui criccunahuanca c'uyanacushpami, cancunaca causacunguichic. Shina cacpipish c'uyashca criccuna, ashtahuan c'uyanacushpa causachunmi mañanchic.

¹¹ Ñucanchic cancunaman ña nishca shinallatac, shucpac causaipi mana satirishpa, quiquin maquihuan imatapish ruhuashpa, sumacta causanata yuyaichic.

¹² Chashna ruhuashpa causashpami, imapish mana illaclla, shinallatac mana criccunapacpish alli nishca causanguichic.

Apunchic Jesús ima shina cutimunamanta

¹³ C'uyashca criccuna, “huañushcacuna mana causaringachu” niccuna shina ama llaquilla cachunmi, huañushcacuna ima tucuna cashcata yachachun munanchic.

¹⁴ Ima shinami Apunchic Jesusca huañushca cashpapish causarishcata crinchic, chashnallatacmi Apunchic Jesusta crishpa, huañuccunataca Jesushuan pacta Dios causachina cashcata crinchic.

¹⁵ Chaimantami Apunchic Jesús cutimungacaman, “ñucanchic causaccunaca huañushcacunata ñaupashpa, jahua pachamanca mana rishunchu” nishpa, Apunchic Jesús yachachishca shinallatac cancunamanca yachachinchic.

¹⁶ Mandac Dios caparishcapish, angelcunata mandac ángel caparishcapish, shinallatac Taita Diospac trompeta tocashcapish uyaringami. Chashna uyaricpica, Apunchic Jesusllatacmi jahua pachamanta shamunga. Chashna tucucpica, maijanpish Apunchic Jesusta crishpa huañuccunaracmi causaringa.

¹⁷ Chai q'uipaca, ñucanchic causacuccunaca causarishcacunandicmi Apunchic Jesushuan jahua pachapi tupangapac p'uyupi apashca cashun. Chashna apacpica, Apunchic Jesushuanmi huiñaita causashun.

¹⁸ Chaimanta cai rimashcacunahuan caishuc chaishuc cushichinacuichic.