1 PEDRO 4 - Nuevo Testamento en Quichua Cañar 1996

Imata ruhuashpapish, Dios ruhuachun cushca shina ruhuanamanta

¹ Shina cashcamantaca, Cristo ima shinami ñucanchic juchacunamanta paipac cuerpopi llaquita aparca, chai shinallatac cancunapish llaquita apanalla caichic. Maijanpish cuerpopi llaquita apacca, jucha mandashca causanatami saquin.

² Cai pachapi causashcacaman cai pacha jucha munaicunata mana ruhuashpa, ashtahuanpish Dios munashca shina causangapacmi, chai shinaca saquin.

³ Cancunaca tauca huatacunatami Diosta mana ricsiccuna shina, mana allicunallata ruhuashpa, imapish mapa munaicunata ruhuashpa, jatun micuicunata micushpa, machashpa, shinallatac millanayai ruhuashcalla dioscunata adorashpa, mana allita ruhuashpa causarcanguichic.

⁴ Cunanca paicunahuan pacta imapish mana allicunata ña mana ruhuacpimi, paicunaca “¿imamantatac ña mana ruhuan?” nishpa, cancunataca c'amishpa rimancuna.

⁵ Shina cacpipish paicunaca huañushcacunatapish, causaccunatapish taripangapac shuyacuc Diospac ñaupapimi, paicuna ima shina cashcata huillangacuna.

⁶ Chaimantami huañushca gentecunamanpish, paicunapac espiritupi Dios munashca shina causachun, alli huillaita huillagrirca. Paicunaca Taita Dios munashcamantami, tucui gentecuna huañuna cashca shina huañurcacuna.

⁷ Tucui ima tiyashcacuna tucurina punzhaca ña chayamucunmi. Chaimanta cancunaca alli yuyaihuan mana shaicushpa, Taita Diosman mañaracuichiclla.

⁸ Tucuimanta yallica caishuc chaishuc c'uyanacuichic. Chashna c'uyanacushpaca, achca juchacunatami perdonanguichic.

⁹ Shinallatac mana huashalla rimashpa, caishuc chaishuc huasipi chasquinacuichiclla.

¹⁰ Taita Diosmanta allita ruhuangapac ch'ican ch'ican ruhuac canata chasquishcamanta, allita ruhuaccuna shina, quiquin chasquishcahuan caishuc chaishucman allita ruhuaichic.

¹¹ Maijan imata huillashpapish, Dios nishca shina huillachun. Maijan shuccunaman ima allita ruhuashpapish, Dios imatapish ruhuaclla cashcahuan ruhuachun. Tucui imata ruhuashpapish, Apunchic Jesucristomanta Taita Dios alli nishca cachun ruhuaichic. Paica huiñaita sumaimanami, imatapish ruhuaipacllami. Chashna cachun.

Llaquihuan cashpapish, cushicuna cashcamanta

¹² C'uyashca criccuna, cric cashcata ricungapac rupachic shina llaquicuna japicpipish, “jaicapi mana japishca llaquicunami japin” nishpa, ama mancharichicchu.

¹³ Chaipac randica, Cristo llaquita apashca shina llaquita apacushcamantaca cushicuichiclla. Chashna cashpami, Cristo sumaimana cashcahuan cutimucpica cushicunguichic.

¹⁴ Cancunahuanca Diospac sumaimana Espiritumi causacun. Chaimanta Cristota c'aticushcamanta c'amishpa rimacpica, cancunamanca mai cushicuimi canga.

¹⁵ Maijan cancunamanta llaquita apashpaca, amatapish huañuchic cashcamanta, shuhua cashcamanta, ima mana allita ruhuac cashcamanta, shuccunapac causaipi satiric cashcamanta llaquichishca cachun.

¹⁶ Ashtahuanpish Jesusta cric cashcamanta llaquita apashpaca, mana pinganachu canguichic. Pinganapac randica, Apunchic Jesusta c'atic cashcamanta Taita Diostami “allimari cangui” nina canguichic.

¹⁷ Taita Dios taripana punzhaca ñami chayamucun. Chaipica paipac huahuacunataracmi Taita Diosca taripanga. Chashna ñucanchictarac taripai callaricpica, Diosmanta alli huillaita mana cazuccunacarin, ¿imachari tucunga?

¹⁸ Dios quillcachishcapica: “Cashcata ruhuacpish jarca jarcallami quishpirin. Chashna jarca jarcalla quishpiricpica, mana allita ruhuashpa juchalliccarin, ¿imachari tucunga?” ninmi.

¹⁹ Chashna cashcamanta maijanpish Dios munashca shina llaquita apacca, imatapish pactachic, tucuita ruhuac Diospac maquipi almata mingashpami, allita ruhuashpa c'atina can.