1 PEDRO 3 - Nuevo Testamento en Quichua Cañar 1996

Cusandic huarmindic ima shina causanamanta

¹ Shinallatac huarmicuna, cancunapac quiquin cusacunata alli cazuichic. Chashna cazucpimi, mana cric cusapish Dios rimashca shimita mana uyasha nicushpapish,

² cancuna Diosta manchashpa, cusata allita cazushpa, allita ruhuacpica, cancuna mana huillacpipish cric tucungalla.

³ Huarmicuna ama yalli ñaccharishpa, curimanta ruhuashcacunata churarishpa, valishca churanacunata churarishpa, jahualla allichirichicchu.

⁴ Chaipac randica cancunapac ucu shungumantatac allichirishpa, mana p'iñaric, alli shungu caichic. Chashna allichirishpami, Diospac ñaupapica huiñaita mai alli nishcacuna canguichic.

⁵ Diospaclla causac ñaupa huarmicunaca Dios yuyailla causashpa, cusata cazushpami, chashna allichirishca shinata ricuchic carca.

⁶ Sara huarmipish chai shinallatac paipac cusa Abrahamta cazushcamantaca, “ñucata mandac” nic carca. Cancunapish tucui imatapish allita ruhuashpa, imata mana manchashpaca, Sara huarmipac huahuacunami tucunguichic.

⁷ Shinallatac cusacunapish, cancunapac quiquin huarmicunahuanca alli yuyaihuan causaichic. Huarmicunaca mana c'aricuna shina fuerzata charincunachu. Chaimanta paicunataca sumacta pushashpa causaichic. Cusacunapish, huarmicunapish Dios c'uyashcallamanta cusha nishca, huiñai causaita japichun c'ayashcacunami canguichic. Chashna causacpimi, Taita Diosca cancuna mañashcataca uyanga.

Criccuna ima shina canamanta

⁸ Ashtahuanpish cancunaca caishuc chaishuchuan c'uyanacushpa, llaquinacushpa, shuc shinalla yuyashpa, ama jatun tucushpa, alli shunguhuan causaichic.

⁹ Shuccuna mana allita ruhuacpipish, ama cancunapish chai shinallatac ruhuaichicchu. Shinallatac c'amishpa rimacpipish, ama cancunapish chai shinallatac rimaichicchu. Chaipac randica Taita Dios allicunata cuchun nishpa munaichic. Taita Diosca allicunata chasquichunmi, cancunataca c'ayarca.

¹⁰ Dios quillcachishcapica: “Maijanpish causaita c'uyashpa, unaicaman cushilla causasha nishpaca, quiquin c'alluhuan mana allita rimanamantapish, quiquin shimihuan llullanamantapish jarcarinami can.

¹¹ Millaimanta anchurishpa, allita ruhuanami can. Shuccunahuan sumacta causanata munashpa, chashnalla causanami can.

¹² Mandac Diosca cashcata ruhuaccunataca cuidanmi, shinallatac mañashcata uyangapacpish shuyaracunmi. Ashtahuanpish mana allita ruhuaccunataca p'iñanmi” ninmi.

¹³ Cancuna allita ruhuana yuyailla cacpica, ¿pitac cancunataca mana allita ruhuangayari?

¹⁴ Cancuna allita ruhuacushca jahua maijan llaquichicpica, cancunamanca mai cushicuimi canga. Cancunata p'iñaccunataca ama manchaichicchu, llaquillapish ama caichicchu.

¹⁵ Chaipac randica “Cristoca ñucanchic Mandacmi” nishpa, tucui shunguhuan alli nichic. Cancuna imata japina cashcata shuyacushcamanta maijan tapucpipish, huillangapac allichirishca caichic.

¹⁶ Ashtahuanpish mana jatun tucushpa, c'uyac shunguhuan chashnaca ruhuaichic. Cancuna Apunchic Jesusta crishpa, allita causacushcamanta maijanpish mana allichu nishpa, rimashcamanta pingachunca, mana pi juchanchishca canata yuyashpa, allita ruhuashpa c'atichiclla.

¹⁷ Dios chai shina munacpica, mana allita ruhuashcamanta llaquita apanapac randica, allita ruhuashcamanta llaquita apanami ashtahuan alli.

¹⁸ Cristoca ñucanchic juchacunamantami, shuc cutinlla huiñai huiñaipac llaquita apashpa huañurca. Paica ñucanchicta Taita Diospacman pushangapacmi, manapish juchayuc cashpa, millaicunamanta llaquita apashpa huañurca. Paica aichallapimi huañurca. Shina cashpapish Dios causachicpimi, espiritupica huiñaita causacun.

¹⁹ Paica chashna cashpami, huichcashca cac almacunaman huillangapac rirca.

²⁰ Chai almacunaca ñaupa taita Noé huambuc huasita ruhuangacaman, Dios manarac p'iñarishpa, shuyacui punzhacunapi mana cazuc gentecunami carca. Chai punzhacunaca pusaccunallami yacullapitac quishpirircacuna.

²¹ Shinallatac chai yacuca bautizarinatami ricuchicurca. Jesucristo huañushcacunapuramanta causarishcamantami, yacupi bautizarishpaca cunanca quishpirishca canchic. Bautizaricpica ima mapata mana anchuchinchu, ashtahuanpish mana alli yuyaicuna ama tiyachun Taita Diosman mañana yuyaicunatami cun.

²² Jesucristomi jahua pachaman rishpa, Taita Diospac alli maquiman tiyacun. Paimi angelcunatapish, poderta charic mandac espiritucunatapish mandacun.