1 JUAN 5 - Nuevo Testamento en Quichua Cañar 1996

Cai pachapi millaita mishashcamanta

¹ Maijanpish Jesusta “Quishpichic Cristomi” nicca Taita Diospac huahuami. Maijanpish Taitata c'uyacca paipac huahuacunatapish c'uyanmi.

² Taita Diosta c'uyashpa paipac mandashcacunatapish pactachishpaca, paipac huahuacunatapish c'uyashcatami yachanchic.

³ Maijanpish Diosta c'uyacca pai mandashcatami pactachin. Pai mandashcacunaca pactachinallami.

⁴ Taita Diospac tucui huahuacunami cai pachapi tiyac millaicunataca mishan. Apunchic Jesusta crishpami, cai pachapi millaitaca mishanchic.

⁵ Maijanpish Jesusta Diospac Churi cashcata cricllami, cai pachapi tiyac millaicunataca mishan.

Jesucristomanta Diospac Espíritu huillashcamanta

⁶ Apunchic Jesucristo shamushcataca yacupish, yahuarpish ricuchinmi. Mana pai bautizarishca yacullachu ricuchin, ashtahuanpish pai huañushca yahuarpish ricuchinmi. Cashcata nic Diospac Espiritullatacmi caicunataca ricuchin.

⁷ Quimsacunami caicunata huillan:

⁸ Diospac Espiritupish, yacupish, shinallatac yahuarpish chai quimsacunami shuc yuyailla cancuna.

⁹ Gentecuna huillashcatapish crinchicmi. Shina cacpipish paipac Churimanta Taita Diosllatac huillashcatami, tucuimanta yallica crina canchic.

¹⁰ Maijanpish Diospac Churita cricca, Taita Diosllatac huillashcatami paipac shungupi charin. Maijanpish Diosta mana cricca, Taita Diosllatac paipac Churimanta huillashcata mana crishcamantami, Diosta llullapi churan.

¹¹ Cai huillashcahuanmi Diosca huiñai causaita cushca. Chai huiñai causaitaca paipac Churillamantami charinchic.

¹² Maijanpish Diospac Churihuan cacmi, chai causaitaca charin. Maijanpish Diospac Churihuan mana cacca, mana chai causaitaca charinchu.

Jesusta criccunaca huiñai causaitapish charishcamanta

¹³ Cancuna Diospac Churita crishpaca, huiñai causaita charishcatapish yachachun nishpami caicunataca quillcani.

¹⁴ Taita Diospac munaipi imatapish mañacpica, paica uyanmi. Shina cashcamantami paipi shunguta churashpa mañanchic.

¹⁵ Taita Dios ñucanchic mañashcata uyac cashcata yachashpami, ñucanchic mañashcata cuna cashcataca yachanchic.

¹⁶ Maijanpish shuc cric mana huañuiman apacuc juchata ruhuacta ricushpaca, paimanta Taita Diosman mañanami can. Chashna mañacpica, Diosca chai cricman causaita cungami. Mana huañuiman apacuc juchata ruhuaccunamantami chashnaca mañana can. Huañuiman apacuc juchacunapish tiyanmi. Chaita ruhuaccunamantaca mana mañachun ninichu.

¹⁷ Tucui mana allita ruhuanacunami jucha. Shina cashpapish huañuiman mana apac juchapish tiyanmi.

¹⁸ Maijanpish Taita Diospac huahua cashpaca, juchata mana ruhuacushcata yachanchicmi. Taita Diospac Churimi paicunataca huacaichin. Chaimantami diabloca imata mana ruhuanata pudin.

¹⁹ Ñucanchicca Taita Diospac huahuacuna cashcatami yachanchic, shinallatac cai pachapaclla causaccunataca diablo mandacushcatapish yachanchicmi.

²⁰ Diospac Churi shamushpa ñucanchicman yuyaita cushpami, cashcata nic Taita Diostaca ricsichirca. Chaimantami cashcata nic-huan shuc shinalla causanchic. Paica Diospac Churi Jesucristomi. Paillatacmi huiñai causaita cucpish, shinallatac cashcata nic Diospish can.

²¹ C'uyashca huahuacuna, ruhuashcalla dioscunata adoranamantaca huacaichiringuichic.