1 CORINTIOS 9 - Nuevo Testamento en Quichua Cañar 1996

Jesús acllashca huillac Pablo, pai ima shina cashcata huillashcamanta

¹ Ñucaca Jesús acllashca huillac cashcamantaca, imatapish ruhuai pudinimi. Ñucanchic Apunchic Jesucristotapish ñucallatacmi ricurcani. Apunchic Jesucristomanta ñuca huillacpimi, cancunaca criccuna tucurcanguichic. Chaitaca cancunallatac yachanguichicmi.

² Shuccuna “mana Jesús acllashca huillacchu cangui” nicucpipish, cancuna Apunchic Jesusta crishpa, paihuan shuc shinalla tucushcamantaca, cancunamanca Jesús acllashca huillactacmi cani.

³ Ñucata juchanchishpa rimaccunataca cashnami nini:

⁴ Ñucanchic huillacushcamantaca micunatapish, ubianatapish, ¿manachu chasquina canchic?

⁵ Shinallatac ñucanchicpish caishuccuna shina, Apunchic Jesuspac huauquicuna shina, Cefas*f** shina, ¿manachu shuc cric huarmita cazarashpa, apai pudinchic?

⁶ ¿Bernabellachu, ñucallachu tandanacushca criccunamanta imatapish mana chasquina canchic?

⁷ ¿Pitac quiquin cullquihuanca soldado tucungapac ringa? ¿Pitac manapish micungapac uvasta tarpunga? ¿Pi michictac lecheta capishpaca, mana ubianga?

⁸ Caitaca Moisés mandashcallapitacmi huillacun. Chaimanta pacta caica gentecunapac yuyaillami nishpa yuyanguichicman.

⁹ Moisesman mandashpa Dios quillcachishcapica: “Trillac huagrataca pacta shimita huatanguiman” ninmi. Dios chashna nishpaca, mana huagracunata llaquishcamantachu nicun,

¹⁰ ashtahuanpish ñucanchicta llaquishcamantami chashnaca nicun. Diosca ñucanchicpac allipacmi mandashcacunataca curca. Shina cashcamantami yapucpish, trillacpish granota japina yuyaihuan chashnaca ruhuan.

¹¹ Chai shinallatacmi ñucanchicca tarpuc runa shina, Dios rimashca shimitaca cancunaman huillarcanchic. Chaimantaca, ¿manachu cancunamantaca imallatapish chasquina canchic?

¹² Shuccuna cancunata imatapish cuchun nishpa mañacpica, ñucanchiccarin imallatapish mañanatacmi canchic. Shina cacpipish Cristomanta alli huillai mana jarcarishpa huillashca cachunca, imatapish mana chasquishpami, llaquita apashpa huillacunchiclla.

¹³ Maijanpish Diosman mañana huasipi servicca, chai huasiman apashca maijan micunatami micun. Chashnaca, chai altarpi serviccunaca Diosman cushpa huañuchishca animal aichatami micuncuna. Chaitaca cancunallatac yachanguichicmi.

¹⁴ Chai shinallatacmi Apunchic Jesusca maijanpish quishpirinamanta alli huillaita huillaccunaca chai huillashcallamantatac micuchun nishpa mandashca.

¹⁵ Shina cacpipish chashna japina cashcataca mana japishcanichu. Shinallatac cancuna imallata cuchun nishpapish, mana quillcanichu. Pimanta imata mana chasquishpa cushicunata quichuchinapac randica, huañunatami munani.

¹⁶ Quishpirinamanta alli huillaita chashna huillashpaca, imamanta mana jatun tucunachu cani, ashtahuanpish chaitaca huillanallatacmi cani. Cai huillanata mana huillashpaca, ¡aij, imachari tucusha!

¹⁷ Ñuca munaillamanta huillashpaca, japina cashcataca japimanmi, ashtahuanpish “huillanami cangui” nishpa, mandashcallamanta ruhuacushpaca, Dios mingashcallatami ruhuacuni.

¹⁸ Shina cacpica ñuca tucuimanta yalli japinaca, pimanta imata mana japishpa, cushicushpa Cristomanta alli huillaita huillanami can. Chashnaca alli huillaita huillashcamanta japina cashca jahuapish, mana japishpami causacuni.

¹⁹ Ñucaca pipac mana huatashca shina cashpapish, achca gentecunata Cristopacman chayachingapacmi, tucuipac huatashca shina tucuni.

²⁰ Israelcunapurapi*f** cashpaca, paicuna quishpirichunmi israelcuna shina tucuni. Shinallatac Moisés mandashcacunata pactachiccunahuan cashpaca, chai mandashcacunata ñuca mana pactachina cashpapish, paicuna quishpirichunmi chai mandashcacunata pactachiccuna shina tucuni.

²¹ Shinallatac Moisés mandashcacunata mana pactachiccunahuan cashpaca, paicuna quishpirichunmi paicuna shina tucuni. Chashna ruhuashpaca, Dios mandashcacunata mana saquishpami, Cristo mandashcata pactachicuni.

²² Manarac sinchi criccunahuan cashpaca, paicuna quishpirichunmi paicuna shina tucuni. Chashna tucui laya tucushpaca, maijancunallapish quishpirichunmi imapish tucuni.

²³ Chai shina alli huillaita huillashpaca, chai huillashca allicunata cusha nishcata japingapacmi, chashnaca tucuni.

²⁴ Shuc callpanapi caccunaca tucuimi callpancuna. Shina cacpipish japina cashcataca shucllami japin. Chaitaca cancunallatac yachanguichicmi. Shina cashcamanta chai japinata cancunapish japingapacca, callpashpa mishanacuc shina alli causaichic.

²⁵ Callpangapac allichiriccunaca chingariclla coronata japingapacmi, ima mana allimanta huacaichirishpa, allita allichirincuna. Ñucanchiccarin mana chingaric coronata japingapacmi, chashna allichiric shina causacunchic.

²⁶ Ñucapish maiman chayana cashcata mana yachac shinaca mana callpacunichu. Macanacucuc shina cashpapish, mana huairapichu huactani.

²⁷ Ashtahuanpish ñuca quiquin cuerpotami macac shina cazuchicuni. Cai shinaca shuccunaman huillashpa mishachishca jahua, ñucarac huashayashpa mana saquiringapacmi chashnaca ruhuacuni.