1 CORINTIOS 6 - Nuevo Testamento en Quichua Cañar 1996

P'iñanacushcata mana criccunaman mana huillagrina cashcamanta

¹ Cancunapurapi maijan p'iñanacucpica, Diospaclla cac criccuna allichichun ninapac randica, ¿ima nishpatac mana cric juezcunapacman allichichun nishpa ringuichicyari?

² Diospaclla cac criccuna cai pachapi causaccunata taripana cashcataca, ¿manachu yachanguichic? ¿Cancuna cai pachapi causaccunata taripana cashca jahuachu, cai uchilla p'iñanacuicunataca mana allichi pudinguichic?

³ Angelcunatapish ñucanchic taripana cashcataca, ¿manachu yachanguichic? Chashna angelcunatapish taripac cashpaca, cai pachapi causaccunallataca, ¿ima nishpatac mana taripai pudinguichic?

⁴ Shina cacpica, cai pacha causaipi p'iñanacui tiyashcataca, ¿ima nishpatac juezcunapacmanca allichichun nishpa ringuichicyari? Paicunaca tandanacushca criccunahuanca imata mana ricunata charincunachu.

⁵ Cancuna pingaita charichunmi, chashnaca nini. Criccunapurapi imapish p'iñanacuicuna tiyacta ricushpa allichichunca, ¿manachu cancunapurapi maijan shucllapish tiyan, imatacyari?

⁶ Cancunapurapica mana caishuc chaishuc p'iñanacuillachu tiyan, ashtahuanpish chashna p'iñanacushpaca, mana cric juezcunapacmanmi allichichun nishpa ringuichic.

⁷ Cancunapura p'iñanacushpaca, mana ima allitachu ruhuanguichic. Chaipac randica cancunata mana allita ruhuacpipish, ¿manachu casilla saquinalla alli canga? Imata shuhuachunpish, ¿manachu saquinalla alli canga?

⁸ Ashtahuanpish cancunaca chaita ruhuanapac randica, criccunapurallami imatapish mana allita ruhuashpa shuhuanacunguichic.

⁹ Ama pandaringuichicchu. Ima millaitapish ruhuaccunaca Dios mandacucpica imata mana charina cashcataca, ¿manachu yachanguichic? Huaclliriccunapish, ruhuashcalla dioscunata adoraccunapish, cazarashca jahua shuc-huan chayariccunapish, huarmi shina canata munashpa c'aricunapura millaita ruhuaccunapish,

¹⁰ shuhuaccunapish, imatapish charinallata munaccunapish, machaccunapish, millaita rimashpa llaquichiccunapish shinallatac crichishpa shuhuaccunapish, Dios mandacucpica imata mana charingacunachu.

¹¹ Shinallatac ñaupamanca cancunapuramanta maijancunaca chashna ruhuaccunallatacmi carcanguichic. Ashtahuanpish cunanca Diospaclla cachun pai acllashpa, chuyayachishcacunami canguichic. Ñucanchic Taita Diospac Espiritumantapish, Apunchic Jesucristomantapish ñami paihuan alli tucuchun chasquishcacuna canguichic.

Tucui cuerpohuan Diospaclla alli causanamanta

¹² Maijanca: “Ñucaca tucui imata ruhuasha nishpapish, ruhuanallami cani” ningachari. Shina cashpapish, imatapish quiquin munashcata ruhuanaca mana allichu. Ñucaca imatapish ruhuangapac cacharishca shina cashpapish, millai munaicuna imatapish ruhuachichunca mana saquinachu cani.

¹³ Shinallatac maijanca: “Micunaca huicsapacmi, cutin huicsaca micungapacmi can” ningachari. Chashna cashpapish Taita Diosca micunatapish, huicsatapish chingachingami. Cuerpoca mana huaclliringapacchu, ashtahuanpish Apunchic Jesuspaclla causangapacmi. Shinallatac Apunchic Jesusca ñucanchic cuerpota Mandacmi.

¹⁴ Shina cashcamanta ima shinami Taita Dios Apunchic Jesusta causachirca, chashnallatacmi ñucanchictapish pai imatapish ruhuaclla cashcahuanca causachinga.

¹⁵ Cancunapac cuerpoca Cristopac cuerpo parte cashcataca, ¿manachu yachanguichic? ¿Cristopac cuerpo parte cashca jahuachu, huaclliric huarmipac cuerpo parte casha? ¡Chaitaca mana yuyanallapish canchicchu!

¹⁶ Shuc runa shuc huaclliric huarmihuan tandarishpaca, ishcai cashpapish shuclla cuerpo tucuc cashcataca, ¿manachu yachanguichic? Chashna cashcamantami Dios quillcachishcapica: “Ishcai cashpapish, shucllami tucun” nicun.

¹⁷ Shinallatac maijanpish Apunchic Jesushuan shuc shinalla tucushpaca, paihuanmi shuc espiritulla tucun.

¹⁸ Huacllirinamantaca anchurichic. Maijanpish ima shuctac juchata ruhuashpaca, mana paipac cuerpota imata ruhuanchu, ashtahuanpish maijan cashpapish huaclliricmi, paipac quiquin cuerpota huacllichishpa, juchahuan mapayachin.

¹⁹ Cancunapac cuerpoca Dios cushca Espíritu causana huasi cashcatapish, Diospac Espíritu cancunapac shungupi causacushcatapish, ¿manachu yachanguichic? Cancunaca mana quiquinpacllachu canguichic,

²⁰ ashtahuanpish Taita Diosmi cancunataca tucuimanta yalli valic-huan paipacta ruhuachun randirca. Chashna cashcamantami tucui cuerpohuan Diospaclla alli causana canguichic.