1 CORINTIOS 2 - Nuevo Testamento en Quichua Cañar 1996

Cristo cruzpi huañushcata Pablo huillashcamanta

¹ C'uyashca criccuna, Taita Diosmanta pimanpish mana huillashcata ñuca huillangapac cancunapacman rishpaca, yachac tucushca rimaicunahuanca mana huillarcanichu.

² Shinallatac ñuca cancunahuan cashpaca, ima shuctac yachanata mana munashpami, Jesucristo yuyailla cashpa, pai cruzpi huañushcamanta ashtahuan yachanata munarcani.

³ Cancunahuan cashpaca, manchaihuan imapacpish mana valic shina, chucchucucmi carcani.

⁴ Cancuna crichunca, imata parlashpapish, alli huillaita huillashpapish, jatun yachac tucushca rimaicunahuanca mana huillarcanichu. Chaipac randica Taita Diospac Espíritu imatapish ruhuaclla cashcata ricushpami, ñuca huillacpica crircanguichic.

⁵ Gentecuna yuyashca shina cancuna ama crichun, ashtahuanpish imatapish ruhuaclla Taita Diosmanta crichunmi, chashnaca huillarcani.

Diosca paipac Espirituhuan yuyaita cuc cashcamanta

⁶ Shina cashpami ña sinchi criccunapura cashpaca, yachac tucuna rimaicunahuan rimanacunchic. Ashtahuanpish cai yachac tucuna rimaicunaca mana cai pachamantachu, mana jatun mandaccunamantachu. Mandaccunaca chingariccunallami.

⁷ Ñucanchicca huiñaita sumac llactapi causagrichunmi, pipish mana yachashca, cai pachata Taita Dios manarac ruhuashpa, huacaichishpa charicushca yachaicunata huillacunchic.

⁸ Chaita mana yachashcamantami, cai pacha mandaccunaca Apunchic Jesustaca chacatarcacuna. Paicuna yachashca cashpaca, sumaimana Apunchic Jesustaca mana chacatanmanchu carcacuna.

⁹ Ashtahuanpish Dios quillcachishcapica: “Imapish mana ricushcata, mana uyashcata shinallatac jaicapi mana yuyashcatami, paita c'uyaccunamanca Taita Diosca cusha nicun” ninmi.

¹⁰ Caicunataca Taita Diosmi paipac Espirituhuan yuyaita cushpa, ñucanchicman yachachishca. Diospac Espiritumi Taita Dios imata yuyacushcatapish yachan.

¹¹ Shungupi imata yuyacushcataca gentecunapurallapica pi mana yachanchu, ashtahuanpish paipac shungupi cac espiritullami yachan. Chai shinallatacmi Dios imata yuyacushcataca gentecunaca mana yachan, chaitaca Diospac Espiritullami tucuita yachan.

¹² Ñucanchicca mana cai pachapaclla cac espiritutachu chasquircanchic, ashtahuanpish Dios cushca Espiritutami, pai c'uyashpa yachachishcacunata entendingapac chasquircanchic.

¹³ Chashna cashpami ñucanchicca mana ñucanchic yuyaillamanta rimanchic, ashtahuanpish Diospac Espíritu yuyaita cushcallatac rimanchic. Shina cashpami Diosmanta yuyaita cushpa, paipac Espíritu yuyaita cushcallata Diosmanta yachanata munaccunamanca yachachinchic.

¹⁴ Diospac Espiritumanta yachanata mana munacca, pai cushcacunataca mana chasquisha ninchu. Chaicunaca paimanca pucllashca shinami. Shinallatac imata nisha nicushcatapish mana entendinchu. Chaitaca Diospac Espíritu yuyachicllapimi, yachac chayancuna.

¹⁵ Ashtahuanpish Diospac Espiritumanta yachanata munacca alli cashcatapish, mana alli cashcatapish yachanmi. Paitaca pi imata mana ni pudinchu.

¹⁶ Dios quillcachishcapica: “Mandac Diospac yuyaitaca, ¿pitac ricsingayari? Shinallatac paitaca, ¿pitac yachachingayari?” ninmi. Shina cacpipish ñucanchictaca Cristomi yuyaita cushpa yachachicun.