1 CORINTIOS 13 - Nuevo Testamento en Quichua Cañar 1996

C'uyaimanta

¹ Gentecunapac rimaita shinallatac angelcunapac rimaita ñuca rimashpapish, c'uyaita mana charishpaca, chilin nic fierro, chilin nic platillo shinallami uyarini.

² Dios ima nishcata huillacushpapish, tucuita yachashpapish, Diosmanta pipish mana yachashcata yachashpapish, shinallatac urcucunata cuyuchingapac tucui shunguhuan cric cashpapish, c'uyaita mana charishpaca, ima mana canichu.

³ Shinallatac ñuca tucui ima charishcata huacchacunaman cushpapish, ñuca cuerpota rupachichun cushpapish, c'uyaita mana charishpaca, ima mana canichu.

⁴ Maijanpish c'uyaita charicca, llaquichicpipish mana p'iñaric, alli shunguyucmi. Shuccuna ama charichun nishpa mana munacchu, shinallatac “allimi cani” nishpa mana jatun tucushcachu.

⁵ Shinallatac imapish pingaipacta mana ruhuacchu, jahualla mana p'iñaricchu, quiquinlla charinata mana munacchu, unaicaman mana p'iñaricchu.

⁶ Shinallatac shuccuna ima mana allita ruhuashcata ricushpapish mana cushicucchu, ashtahuanpish alli cacta ricushpa cushicucmi.

⁷ C'uyaita charicca ima llaquitapish apacmi, crishpa c'aticmi, shuyana cashcata shuyacmi, shinallatac imamantapish mana p'iñarishpa jarcaricmi.

⁸ Dios ima nishcata huillanapish tucuringami. Jaicapi mana uyashca rimaicunata rimanapish, ña mana tiyangachu. Ima yachanacunapish tucuringami. Shina cacpipish c'uyaica jaicapi mana tucuringachu.

⁹ Ima yachanacunatapish, mana tucui yachanchicchu. Chashnallatac Dios ima nishcamantapish, yachashcallatami huillanchic.

¹⁰ Ima shina cashcatatac yachana chayamucpica, chai ashalla yachashcaca chingaringallami.

¹¹ Ñuca huahuarac cashpaca, huahua shinami yuyaric carcani, rimac carcani. Shinallatac huahua shinami imatapish ruhuasha nic carcani. Ña juizhuyashpaca, huahua shina ruhuanataca saquircanimi.

¹² Cunanca espejopi amsa amsallata ricucushca shinallami, ashallata yachanchic. Shina cashpapish shamuc punzhaca ima shina cashcatatac, ñahui ñahuimari ricushun. Cunanca ñucaca ima shina cashcatatacca mana yachanichu. Shina cashpapish, ima shinami Taita Dios ñucata ricsin, shinallatacmi shamuc punzhaca ricsisha.

¹³ Caicunamanta nishpaca, crinapish, imata shuyana cashcata shuyanapish, shinallatac c'uyaita charinapish tiyashpa c'atingallami. Ashtahuanpish cai quimsacunamanta yallica c'uyaimi.