Gálatas 3 - Diosbuj Shimi - Mushuj Testamento (Quichua Salasaca)

Mandushkamunda na gashaga crinamunda

¹ ¡Galacia crijkunalla, yuyi illujmi ganguichi! ¿Pidi kangunadaga muspayachigari? Jesucristo chakatashkada kangunaj ñaubukidi rikuchishkama laya ñami parluganchi.

² Kailladami kangunamunda yachungu munani: ¿Mandushkada p'aktachishkamundachu? na gashaga ¿uyusha crishkamundachu Diosbuj Espiritudaga japiganguichi?

³ ¿Yuyi illujchumadi ganguichi? ¿Espiritun kallarishka jawash kununga aicha ruri pudishkallanchu p'aktachingu munanguichi?

⁴ ¿Imadadikish pasushkaga yangallachu? ¡Yangadijmaga na gashkachunga!

⁵ Dios Paibuj Espirituda kusha shinaidi pi na ruri pudishkada kangunapurabi rurushaga ¿mandushkada p'aktachishkamundachu shina rurun? Ashtan uyusha crishkamundami gan.

Abrahamgun Dios ari nishkamunda

⁶ Shina layaidimi, “Abrahamga Diostami criga, shinushami Diosga ima juchachinash illujmada shina japiga.”

⁷ Shinushaga kaida yachichi: Abrahambuj wawagunaj wawagunadijka Diosta crijkunami gan.

⁸ Sarunmundadi Dios escribichishkabiga nishkamiga. Shinusha kai Alli Shimidaga, “Tuki llaktagunami kanmunda Diosbuj alligunada japinga,” nisha Abraham-mumi ñaubarijti ña parlushkaga.

⁹ Chimunda, crij Abraham-mu alligunada kushka shina, mashnalla crijkunamush kushkami ganga.

¹⁰ Mandashkagunada ruranallabi tuki mashnalla yuyida churujkunaga nishkabimi ganguna; shinusha escribishkabiga, “Mandashka librobi escribishkagunada ruragusha na illujta p'aktachijkunaga, ima llakish tukushkanmu,” nishkami tiyan.

¹¹ Shinakiga Diosbuj rikibiga mandashkabi nishkagunada rurashkanga ima juchachinash illujmaga pish na ganchu; shinusha, “Juchachinash illujka crishkallamundami kausunga,” nishkaga. Chiga laruidimi gan.

¹² Shinash mandushkaga crishkamundaga na shamunchu; ashtangarin, “Maijinsh mandushkabi nishkagunada p'aktachijka chigunamundami kausunga,” ninmi.

¹³ Mandushkagunada na p'aktachishkamunda llakichinalla gakimi Cristoga ñukuchij randi, pachun llakida apasha kishpichiga. Chimunda Dios escribichishkabiga, “Maijinbish kaspibi warkushka wañujka nishkami gan,” nin.

¹⁴ Abraham-mu Dios alligunada nishka na israelgunamush Jesucristomunda kushka gachun shinaidi crishkamunda ñukuchikish nishka Espirituda japichunbishmi shina tukuga.

¹⁵ Wauki paniguna, kaidaga maijin gentesh intindinalladami parlasha. Gentegunapurallabish imadash rurungu, ña ari ninukusha firmanukushka k'ipaga mirachinamash ningumash pish na pudingachu.

¹⁶ Kununga shinakiga, Diosga Abraham-mu nishkagunadaga paibuj wawagunaj wawamushmi nishkaga. Shina escribishkabiga, taugaidi wawagunamamu layaga na nigunchu; ashtangarin nishaga shujlladami nigun. Paiga Cristomi gan.

¹⁷ Kaidami nisha nini: Diosga Abrahamgun ari ninukushkadaga ña nishkamiga. Chimundami Moisesbuj mandushkagunaga chusku patsaj kinsa chunga (430) wata k'ipa shamushkashaga shina ari ninukushkadash na chingachinllachu, Dios nishkadash yangabiga na churi pudingachu.

¹⁸ Diosmunda japinashkaga mandashkagunada kazushkamunda gashkakiga nishkamundaga ña na ganmuchuga. Ashtangarin Diosga Abraham-mu nishkamundaga kumbidagallami.

¹⁹ Shinakiga ¿mandushkagunaga ima allibujti gan? Genteguna na kazuj gashkada rikuchingaj chi mandushkaga paltushka gaga; Dios nishkada japingu gaj wawadi shamungagamami chidaga kuga; shuj mañusha kuj Moisesbuj makibimi angelgunada kuchiga.

²⁰ Shuj gentella gakigarin mañusha kujmash na tiyanash kabinchu. Shinash Diosgarin shujllami gan.

Mandushkaga ima allijti gashkamunda

²¹ Shina gakiga mandushkagunaga Dios nishkagunadaga ¿shujtijtadichu nin imadi? ¡Nalladij shinachugun! Mandashkagunaga kausida kui pudij gashkakiga chi mandushkada kazushkallamundami ima juchachinash illuj tukungunamuga.

²² Ashtangarin Dios escribichishkabi nishka shinaga, juchaga tuki ima tiyashkagunada illujtada prezu shina charigun. Mashnalla crijkunaga Jesucristoda crishkallamunda Dios nishkadaga japichunmi shina nin.

²³ Shina gakish crina narij chayamukiga Mandushkaga chi crinada yachi chayachishka gachunmi ñukuchida ichkushtasha prezu layada chariguga.

²⁴ Shinusha ñukuchi Cristobi criki ima juchachinash illujta rurushka gachunmi Mandashkaga ima layami shuj sirvijka marada iñachij gan shinaidimi Paibujmu pushaj gaga.

²⁵ Shinash crina p'unlla chayamushkamundami, iñachisha sirvijbuj ukubi ña na ganchichu.

²⁶ Cristo Jesusta crishkamundami tuki kangunaga Diosbujti wawaguna ganguichi.

²⁷ Shinaidi mashnalla Cristobi bautizarijkunaga Cristobimi churarij shina churarishkanguichi.

²⁸ Israel ganash griego ganamash ña na tiyanchu; watushka laya na watushka layamash, k'arish warmish illunmi; tuki kangunami Cristo Jesusbi shuj shinalla ganguichi.

²⁹ Ña Cristoj gashami Abrahambuj wawagunaj wawagunadi ganguichi, shinaidi Dios nishkadash japijkunami ganguichi.