Apocalipsis 15 - Diosbuj Shimi - Mushuj Testamento (Quichua Salasaca)

Kanchis angelguna kanchis llakichinagunan

¹ Kutinmi jawa pachabi naidikish rikushka mancharinaidida rikugani: kanchis tukurij llakichinagunan kanchis angelgunamiga; chi llakichinagunanmi, Dios p'iñarishkaga illujta p'aktachisha tukuchishka gaga.

² Shinaidi ninan chagrushka cristalmu rijchuj jatun yaku kuchadami rikugani; mancharibujti animalda, chi animalmu rijchuj musrhadash shinaidi paibuj shutida rikuchij numerodash na churachisha vincijkunami chi cristal laya yaku kucha kuchullabidi shayagaguna. Dios kushka tukana arpagunada charishkagunaga.

³ Paigunami Diosbujta ruruj Moisesbuj cantoda shinaidi Malta Ovejaj cantodash kishna nisha cantagaguna: “Tukida ruri pudij Manduj Dioslla, tuki Kan rurushkagunaga k'uilla shinaidi jatunmi gan. Llaktagunada jatun manduj Dioslla, Kambuj ñangunaga alli shinaidi kabishkami ganguna.

⁴ Mandajlla, ¿pidi Kandaga na manchungari? nishash ¿pidi na ningari? Kanllami ima juchash illuj gangui; Kan kabishkada rurushkagunada rikuchij gashkamunda tuki llaktagunamunda shamusha Kandaga ningaguna.”

⁵ Kaiguna k'ipa rikushami jawa pachabiga Diosbuj wasi paskarijta rikugani. Chiga ari ninukushkada rikuchij Diosbuj tuldushka wasilladimiga.

⁶ Diosbuj wasimundaga, chi kanchis angelguna kanchis llakichinagunada apushkami llujshigaguna. Paigunaga linshulla p'alaniguj lino linson churarishka shinaidi kuri chumbida pecho kinribi chumbillishkagunami gaga.

⁷ Kausida charij chuskugunamunda shujka chi kanchis angelgunamu kuri copagunada shuj shuj kuga. Chi copagunaga ima urash na tukuringama kausaj Dios manchanaidi p'iñarisha llakichinan jundadimiga.

⁸ Chibimi Diosbuj wasibiga Diosbuj podermunda shinaidi Paibuj k'uilladi gashkamunda shamuj kushnin junduga. Shina gakimi kanchis angelguna apashka kanchis llakichinaguna tukuringamaga Diosbuj wasimuga maijinbish na waigui pudigachu.