Hebreos 1 - Quechua North Junín

Diosga unaypitam tucuynaypa rimapamasha canchi

¹ Diosninchiga quiquinpita unay wichan awillunchicunata achca cutim, jinaman tucuynaypam willachira unay willacugnincunawan.

² Nätan cay ushanan junagcunaga Dios-mayin Jesucristowanmi willachimaranchi. Pay Jesucristowanmi Diosga rurara jana pachatas cay pachatas. Chauraga Jesuspam lapan ima-aygas.

³ Chaynuytan Jesusga Dios alisca munayniyog cangantas shumag musyayächimanchi, jinaman payga quiquin Diosnuymi cayansi. Chaura payga alisca munayniyogmi, chaymi ima-aygas pay ningannuyla carcayan. Paymi wanusha juchanchicunapita perdonasha cananchipag, nätan cananga Diospa derëchanchrümi tayayan mandayar.

Jesusga angelcunapitas mas munayniyogmi cayan

⁴ Munayniyog angelcunas carcayanga Diospa serviglanmi, nätan Jesusga mas munayniyogmi cayan paycunapitaga Diospa-mayin car.

⁵ Chaura Diosga manam imaysi maygan angeltas: “Gamga cayanqui Dios-mayïmi” nirachu ni “Cananmi niyag Dios-mayï canaypag” nirapishchu. Juclä isquirbishachrüsi manam maygan angeltas: “Nogam cashag paypa Dios-mayin”, nätan “Paymi canga nogapa Dios-mayï” nirapishchu.

⁶ Antis isquirbishachrüga chay japalaylan-mayinta cachraramur Diosga cay niyanmi: “Lapay angelcuna payta alawapäcuy” niram.

⁷ Nätan angelcunapitas Diosga cay niyantan: “Angelcunaga carcayan alisca munayniyogmi alisca manchay walyaynintin räyu aywamugnuymi” niyanmi.

⁸ Nätan Diospa-mayin Jesuspitaga cay nirmi isquirbirayan: “Gamga mandag Diosmi canqui imaypita imaycamas, jinaman mandarsi ali ruragmi canqui.

⁹ Chaymi ali ruragta cuyayanqui, nätan mana ali ruragcunata chregniyanqui. Chaynuy captiquim nogaga acrarayag mandag canaypag. Chaymi cushirayanqui waquin runacunapitas mas” nirmi.

¹⁰ Chaypitas isquirbishachru Diosga cay niyanran: “Gam munayniyogmi galarinanchru jana pachatas cay pachatas ruraray.

¹¹ Chay rurangaycunaga ushacangam, nätan gamga imaycamas cawanquim. Chaycunaga lapanmi juc jacu sagpinuysi ushacanga.

¹² Gamga lapan camangaycunata munangaytam ruranqui juc sagpi jacuta wicapagnuysi. Nätan mushog jacuta ruragnuymi ima-aygatas mushogta ruranqui. Nätan gamga pachalanmi cawanqui imay imaycamas” niyanmi.

¹³ Diosga manam imaysi maygan angelcunatas “Cay derëchäman tayucuy mandanaypag, chay chregnishugniquicunata naupayman chrarachimuptï pampaman lagashtarcachir munangayta ruranaypag” nirachu.

¹⁴ Antis angelcunaga cayan Diospa cachran ruraglam. Paycunataga cachramun payman yupachicugcunata yanapänanpagmi.