Apocalipsis 7 - Quechua North Junín

Diospa marcashan runacunata ricapurü mana cunchupäcugtam

¹ Chaypita ricapurü chruscu angelcunatam, cay pachachru chruscun lädupapita walyay jarcararcayagta, mana cay pachamansi, ni gochramansi, ni ima jachramansi mana walyamunanpag.

² Ricapurütan juc angeltas inti yargamunanpita aywayämugta. Payga apamunag cawayag Diospa unanchacunantam. Chaypitam chay chruscu angelcuna cay pachatas, jatun gochratas lutanta rurapäcunanpag nishataga, gayachracuypanuy cay nirun:

³ “Ama ima lutantas rurapäcuyragchu cay pachatas, ni gochratas, ni monticunatas Diosninchi servig runacunata urcunchru marcapäcamungancama”.

⁴ Chauraga mayarü “Israelpa chay lapan castancunapita, juc pachrac, chruscu chrunca chruscuyog waranga, nä unanchasha capäcungantam. Chaycuna capäcunag:

⁵ Judäpa castanpitam chrunca ishcayniyog waranga Rubenpa castanpitam chrunca ishcayniyog waranga Gadpa castanpitam chrunca ishcayniyog waranga

⁶ Aserpa castanpitam chrunca ishcayniyog waranga Neftalïpa castanpitam chrunca ishcayniyog waranga Manasespa castanpitam chrunca ishcayniyog waranga

⁷ Simeonpa castanpitam chrunca ishcayniyog waranga Levïpa castanpitam chrunca ishcayniyog waranga Isacarpa castanpitam chrunca ishcayniyog waranga

⁸ Zabulonpa castanpitam chrunca ishcayniyog waranga Josëpa castanpitam chrunca ishcayniyog waranga Benjaminpa castanpitam chrunca ishcayniyog waranga unanchasha” nimugta.

Caychru waquin runacunatas ricapurütan jana pachachrüga

⁹ Chaypita rircärirga ricapurü alisca achca runatam lapan nacioncunapita. Paycuna capäcunag tucuy castacunam, tucuy rimayniyogcamam, lapan marcacunapitam. Paycuna chay trönuchru tayayag Diospa, jinaman Achrcashnuysi cayagpa naupanchrümi, yurag jacushacama, räman aptashacama shayarcayänag. Nätan manam pisi yupayta atipänagchu.

¹⁰ Paycunaga lapanmi gayachracuypanuy alawapäcunag caynuypa: “Wac trönuchru cayag Diosmi, jinaman wac Achrcashnuysi cayagmi salvamasha canchi” nir.

¹¹ Chauraga shayararcayänag chay trönu muyurigninpaga lapan angelcunam. Chay angelcuna naupanpam muyurarcayänag ishcay chrunca chruscuyog mandacuna. Chay mandagcuna naupanpam muyurarcayänag chruscu angelnuysi cayagcuna. Paycunam gongorpacuyur lipucayärin umancunas pampaman tupangancama cay nir Diosta alawarcayar:

¹² “Razonpa ali nisha, jinaman alisca alipag ricasha cachun Diosninchiga, yachrag canganpita, munayniyog canganpita, calpayog canganpita. Chaynuylar alawayäshun, ‘Gracias’ niyäshun imaypita imaycamas. Chaynuy cachun” nir.

¹³ Chaura chay mandag runacunapitam jucga tapuraman cay nir: “¿Pïcunatag carcayan cay yurag jacushacunaga? ¿Maypitatag aywararcayämun?”

¹⁴ Nimaptinga cay nirümi: “Munayniyog, gamga musyayanquim”. Chauraga nimanmi: “Paycunaga chay ima-aygatas alisca cunchurmi cayman aywararcayämun, jinaman chay Achrcashnuysi cayagman yupachicurmi mana juchaynag carcayan.

¹⁵ Chaymi paycunaga wac trönuchru tayayag Diospa naupanchrüsi, jinaman Diospa cacunan wayichrüsi, pagaspas junagpas servircayan. Nätan trönuchru tayayag Diosmi canga paycunawan, paycunata washananpag.

¹⁶ Chaura paycunataga manam ni micanapäcungas ni yacunapäcungas, ni manatan juc acaysi ni intipa acayninsi rupangachu.

¹⁷ Chay trönuchru tayayag Diospa naupanchru Achrcashnuysi cayagmi ricanga uyshata michignuysi. Jinaman paymi uyshata yacuta upyananpag pucyuman pushapagnuysi cawachinga imaycamas. Chauraga nä manam pisi wagangachu” nimanmi.