Salmo 99 - Tayta Diospa Wilakuynin

Salmo 99 (98) Tayta Dios munayyuq rey kashqanpita alabashqan

¹ ¡Tayta Diosmi mandamaqninsi rey kaykan! Querubinkunapa chawpinchömi trönunpis kaykan. Juzgaptin kay pasapis y lapan runakunapis suksukyäyanqami.

² Sión lömacho Tayta Dios munayyuqmi kaykan. Kay pasacho kaq runakunata lapantami munaynincho sararaykan.

³ ¡Munayyuq y mansariypaq kashqanpita alabayay! ¡Payqa santumi kaykan!

⁴ Tayta Dios, munayyuq reymi kaykanki. Imaypis alilatami ruranki. Intëru Israel nacionchömi imaypis ali mandanki.

⁵ ¡Tayta Diosninsita alabayay! ¡Nawpanman qonqurpakuyay! ¡Payqa santumi kaykan!

⁶ Moiséswan Aarónmi sirviqnin cürakuna kayarqan. Samuelnami imaypis payta manakurqan. Paykuna manakuyaptin Tayta Dios imaypis yanaparqanmi.

⁷ Pukutay ichiraykaqpitami Moiséstawan Aarónta parlapämurqan. Paykuna leyninkunata lapantami cumpliyarqan.

⁸ Tayta Diosnilä, manakuyäshuptiki wiyarqaykimi. Jusalikuyashqanpita castigarpis perdonarqaykimi.

⁹ ¡Tayta Diosninsita alabayay! ¡Sagrädu lömaman aywaykur qonqurpakuyay! ¡Tayta Diosninsiqa santumi kaykan!