Salmo 98 - Tayta Diospa Wilakuynin

1a

Salmo 98 (97) Chikiqninkunata vincishqanpita Tayta Diosta alabashqan

1a (1a) Salmu.

¹ 1 (1b) Mushuq alabanzawan Tayta Diosta alabayay. Paymi espantaypaq kaqkunata rurash. Munayyuq karmi lapan contrankunata vincish.

² Contrankunata vincishqantami Tayta Dios wilakush. Chikiqninkunata castigashqantami lapan nacioncho taq runakunata musyasish.

³ Israel runakunata kuyar promitishqantami cumpliykan. Intëru kay pasacho pïmaypis musyanmi Tayta Diosninsi salvakuq kashqanta.

⁴ Kay pasacho taqkuna, kushikuyashpayki Tayta Diosta alabayay. Lapan shonquykikunawan alabanzakunata cantayay.

⁵ Arpata tukapalanpa Tayta Diosta alabayay. Cuerdayuq instrumentukunata tukapalanpa alabayay.

⁶ Tayta Diosqa mandamaqninsi reymi kaykan. Cornëtakunata y waqrakunata tukapalanpa alabayay.

⁷ Lamarpis y saycho kaykaqkunapis kushish qaparäyäsun. Kay pasapis y kay pasacho taqkunapis fiyupa kushikuyäsun.

⁸ Mayukunapis kushikuypita paqchipäyäsun. Jirkakunapis kushish cantayäsun.

⁹ Tayta Diospa nawpancho alabayäsun. Payqa lapan runakunata juzgananpaqmi shamuykan. Paymi kay pasacho taqkunata mana jananpaypa juzganqa.