Salmo 97 - Tayta Diospa Wilakuynin

Salmo 97 (96) Tayta Dios mandamaqninsi rey kashqan

¹ ¡Tayta Diosmi mandamaqninsi rey kaykan! ¡Kay pasacho taqkuna, kushikuyay! ¡Maysay islacho taqkunapis, kushikuyay!

² Paypa nawpankunachöqa yana pukutaymi kaykan. Shumaq mandaq karmi pitapis mana jananpaypa juzgan.

³ Puntantami nina rupaykar aywan. Say ninawanmi chikiqninkunata ushakäsin.

⁴ Elqukuyninpis intëru kay pasatami asikyapan. Sayta rikarmi kay pasa fiyupa suksukyan.

⁵ Tayta Diosqa intëru kay pasapa duëñunmi kaykan. Paypa nawpanchöqa jirkakunapis cëranömi suluyan.

⁶ Jana pasapis Tayta Dios alilata ruraq kashqantami wilakun. Maysay nacioncho taq runakunapis munayyuq kashqantami rikaykäyan.

⁷ Lapan dioskunapis Tayta Diospa nawpanmanmi qonqurpakuyan. Saymi ïdulukunata adoraqkuna penqaytukush quëdayanqa. Ïdulukunata adorar chölu tukuqkunaqa lapanmi penqakuyanqa.

⁸ Tayta Dios, qammi runakunata shumaq juzganki. Saymi Sióncho taqkuna fiyupa kushikuyan. Intëru Judácho taq runakunapis pasaypami kushikuyan.

⁹ Tayta Dios, intëru kay pasacho kaqkunapaqpis munayyuqmi kaykanki. Lapan dioskunapitapis mas munayyuqmi kaykanki.

¹⁰ Jusalikuyta mansapakuqkunataqa Tayta Dios kuyanmi. Payman yärakuqkunataqa imapitapis sapanmi. Fiyu runakunapa makinpitapis salvanmi.

¹¹ Saymi ali runakunaqa aksichöno ali kawayan. Dios munashqanno kawaq runakunaqa kushikuyanmi.

¹² Ali runakuna, Tayta Diospa makincho kayashqaykipita kushikuyay. Paypa jutinta joqarir alabayay.