Salmo 92 - Tayta Diospa Wilakuynin

1

Salmo 92 (91) Kuyakuq kashqanpita Tayta Diosta alabashqan

1 (1) Kay salmuqa jamay junaqcho cantanapaq alabanzami.

¹ 1 (2) Tayta Dios, qamta agradëcikushqäqa seqaypa alimi. Poderyuq Tayta Dios, qamta alabar sellämami kushikü.

² 2 (3) Tutapami kuyapäkuq kashqaykipita alabashayki. Sakaypanami promitishqaykita cumpliq kashqaykipita adorashayki.

³ 3 (4) Chunka cuerdayuq arpa malwawan, jatun arpawan y salteriuwanmi alabashayki.

⁴ 4 (5) Tayta Dios, lapan rurashqaykita rikarmi kushikü. Saymi shonqü selläma kushikun.

⁵ 5 (6) Tayta Dios, rurashqaykikunaqa admiraypaqmi kaykäyan. Yarpashqaykitaqa ¿piraqchi musyanman?

⁶ 6 (7) Lutan ruraq runakunaqa saykunata manami tantiyakuyansu.

⁷ 7 (8) Waray warayninkuna ushakäyänalanpaqmi yaqa runakuna y mana cäsushuqniki runakuna mana ali qewano miraykäyan.

⁸ 8 (9) Tayta Dios, qammi isanqa imayyaqpis rey kaykanki.

⁹ 9 (10) Contrayki kaqkunaqa lapanmi ushakäyanqa. Mana ali runakunaqa maysaypami aywakuyanqa.

¹⁰ 10 (11) Törupa fuerzanno fuerzäpis kananpaqmi kalpatapis qomanki. Yanapämaptikimi pasaypa kushikü.

¹¹ 11 (12) Rikashaqraqmi conträkuna ushakäyashqanta. Chikimaqnïkuna nakar waqashqantapis wiyashaqraqmi.

¹² 12 (13) Ali runakunaqa palmëra jachanöraqmi aska wata kawayanqa. Líbanucho cedru jachanöraqmi kayanqa.

¹³ 13 (14) Tayta Diospa wayinchömi imaypis paykuna kaykäyan. Templu patiucho kuyaylapaq waytakunanömi kaykäyan.

¹⁴ 14 (15) Awkinyarpis maqtanölami kaykäyan. Imaypis mana qeshyaypa ali kalpayuqmi kaykäyan.

¹⁵ 15 (16) Saychömi Tayta Dios sapämaqninsi kashqanta wilakuyan. Ali runakunapa favornin imaypis sharkushqantami wilakuyan.