Salmo 90 - Tayta Diospa Wilakuynin

1a

Libru 4 Salmo 90—106 Salmo 90 (89) Yupash watala runakuna kawayashqan

1a (1a) Kay salmuqa Diospa sirviqnin Moisés ruwakushqanmi.

¹ 1 (1b) Tayta Dios, qammi imayyaqpis pakakuyänä kaykanki.

² Jirkakuna manaraq kaptinpis y kay pasa manaraq kaptinpis unaypita pasa imayyaqpis qamlami Dios kaykanki.

³ Qam munaptikimi runakuna wanuyan. Qam niptikimi wanur alpaman tikrayan.

⁴ Qampaqqa waranqa (1,000) watapis juk junaqnölami kaykan. Paqaspa juk ishkay höra päsaqnölami kaykan.

⁵ Elaqpitami runakunata yaku apaqno apakunki. Runakunaqa juk qepishtaynölami kaykäyan. Lulu qewanölami kaykäyan.

⁶ Tukturaykar warämuq waytano kaykarpis tardipaqa äjusyashnömi kaykäyan.

⁷ Rabyashpaykiqa juklami ushakäsiyämanki. Ajanaptikiqa pasaypami mansariyä.

⁸ Lapan jusalikuyashqäta musyaykankimi. Pakaylapa mana alita rurayashqätapis rikaykankimi.

⁹ Fiyupa rabyakuptikiqa chipyaqmi ushakäyäshaq. Imayka jämaynölami kawayashqäpis kaykan.

¹⁰ Wakinnïqa qanchis chunka (70) watayaqlanami kawayä. Mas fuerti kaqkunalami puwaq chunka (80) watayaq chäyan. Sayno aska wata kawarpis aruywan nitipakashlami kawayä. Watakuna päsashqannömi noqakunapis manaraqpis aykäta ushakäyä.

¹¹ Imajinanpa rabyashqaykita manami pipis musyansu. Seqaypa ajanashqaykita manami pipis tantiyansu.

¹² Yupash watala kawayänäpaq kashqanta tantiyaykasiyälämay. Saynöpami tantiyakuyäshaq munashqaykino kawayänäpaq.

¹³ Tayta Dios, yapay yanapaykayälämay. ¡Imayyaqraq qonqaykayämanki! Sirvishuqniki kaykäyaptïqa kuyapaykayälämay.

¹⁴ Kuyamashqaykita cada tuta tantiyaykasiyälämay. Saynöpami wanuyashqäyaq imaypis kushish alabayäshayki.

¹⁵ Aska wata lakikular kawayänäpaqmi nakayman churayämashkanki. Sayman tupu aska wata kushish kawayänäpaqpis yanapaykayälämay.

¹⁶ Sirvishuqniki kaykäyaptïqa noqakunatapis surïkunatapis yanapäyämar kushikuypaq kaqkunata ruraykulay.

¹⁷ Tayta Diosnilä, kuyakuq kashqaykita tantiyaykasiyälämay. Lapan aruynïkunamanpis bendicionnikita churaykalämuy.