Salmo 9 - Tayta Diospa Wilakuynin

1

Salmo 9 (9a) Nakaqkunata Tayta Dios yanapashqan

1 (1) Cantaqkunapa mandaqninpaqmi. Kënatawan arpata tukapalanpa cantayanki. David qelqashqan salmu.

¹ 1 (2) Tayta Dios, lapan shonqüwanmi alabashayki. Mansariypaq rurashqaykikunatami wilakushaq.

² 2 (3) Yanapämashqaykita tantiyarmi seqaypa kushikü. Poderyuq Tayta Diosnilä, qamlatami imaypis alabashayki.

³ 3 (4) Yanapämaptikimi conträkuna qeshpikuyan. Qeshpiykäyashqanchömi wanuyanpis.

⁴ 4 (5) Trönuykiman jamaykurmi conträkunata juzgashkanki. Manakaqta jitapäyämaptinpis favornïmi sharkushkanki.

⁵ 5 (6) Juklä nación runakunata olqutupashkankimi. Jusalikur kawaq runakunatapis wanusishkankimi. Paykunataqa manami pipis yarpanqanasu.

⁶ 6 (7) Conträ runakuna lapanmi ushakäyash. Markankunapis chipyami ushakäyash. Markankunapa jutinkunapis qonqakashnami kaykan.

⁷ 7 (8) Tayta Diosqa imayyaqpis mandamaqninsi reymi kaykan. Paymi trönunman jamaykur runakunata juzganqa.

⁸ 8 (9) Lapan runakunatami imanöpis kawayashqanman tupu juzganqa. Lapan naciontami mana jananpaylapa juzganqa.

⁹ 9 (10) Tayta Diosmi muchuqkunapa favornin sharkun. Nakaptinpis paymi yanapan.

¹⁰ 10 (11) Tayta Dios, ashishuqnikikunataqa imaypis yanapaykankimi. Saymi makikicho kawaqkuna qamlaman yärakayämun.

¹¹ 11 (12) Sióncho taykaq Tayta Diosta alabashun. Yanapaykämashqansita maysay nacionkunachöpis wilakushun.

¹² 12 (13) Wanusikuq runakunataqa Tayta Dios juzganmi. Nakaqkuna waqapäyashqanta wiyar yanapanmi.

¹³ 13 (14) Kuyapaykalämay, Tayta Diosnilä. Conträkuna nakasiyämaptin yanapaykalämay. Wanusiyämänanta ama kachapaykulaysu.

¹⁴ 14 (15) Yanapämaptikiqa Siónpa punkunkunaman aywaykurmi pïmaytapis wilapäshaq alabayäshunaykipaq. Salvamashqaykipitami kushish alabashayki.

¹⁵ 15 (16) Juklä nación runakunaqa kikin uchkushqan pözuman jeqaqnömi kaykäyan. Trampata churayashqanman kikin jatikaqnömi kaykäyan.

¹⁶ 16 (17) Saynöpami Tayta Dios tantiyasimansi mana cäsukuq runakunata castigaykashqanta. Castigash kayänanpaqqa kikinkunami jusayuq kaykäyan. Higaión. Selah

¹⁷ 17 (18) Jusalikur kawaq runakuna y Diosta mana cäsukuq runakunaqa wanurmi ushakäyanqa.

¹⁸ 18 (19) Muchuqkunata Tayta Dios manami chipyaqsu qonqaykunqa. Jukla mana salvarpis nirkurqa salvanqami.

¹⁹ 19 (20) Tayta Dios, jukla yanapaykulay. Runakuna lutanta rurayänanta ama kachapaykulaysu. Mana criyiq juklä nación runakunata nawpaykicho juzgaykulay.

²⁰ 20 (21) Mansakäyänanpaq rigorwan juzgaykulay, Tayta Dios. Ushakaqla kashqanta tantiyaykasilay. Selah