Salmo 86 - Tayta Diospa Wilakuynin

1a

Salmo 86 (85) Kuyapänanpaq Tayta Diosta manakushqan

1a (1a) Kay salmuqa Tayta Diosta David manakushqanmi.

¹ 1 (1b) Tayta Dios, ruwakamushqäta wiyaykalämay. Pasaypa lakikur ima ruraytapis manami kamäpaküsu.

² Munashqaykino kawarmi wanuypita salvaykamänaykipaq manakamü. Sirviqniki karmi ruwakamü imaykapitapis sapaykamänaykipaq. Diosnï kaptikimi qamman yärakamü.

³ Tayta Dios, kuyapaykalämay. Imay hörapis qamtami manakamü.

⁴ Sirviqniki karmi valorta qoykamänaykipaq manakamü. Qamlamanmi imay hörapis yärakaykämü.

⁵ Qamqa alilata ruraqmi y perdonakuqmi kanki. Qamman yärakamuqkunata kuyapankimi.

⁶ Tayta Dios, manakamushqäta wiyaykalämay. Ruwakamushqäta chaskiykalämay.

⁷ Imaypis wiyamashqaykita musyarmi lakikushqä höra manakamü.

⁸ Tayta Dios, manami qamnöqa ima diospis kansu. Qam rurashqaykitanöqa manami pipis ruransu.

⁹ Qammi lapan nacionkunata kamashkanki. Lapan nación runakunami adorayäshunaykipaq shayämunqa. Puntaykiman qonqurpakamurmi jutikita joqariyanqa.

¹⁰ Qam japalaykimi Dios kaykanki. Munayyuq kashpaykimi espantaypaq milagrukunatapis ruraykanki.

¹¹ Imano kawanäpaqpis nänikita reqiykasilämay, Tayta Dios. Say nänilaykipami imaypis purishaq. Lapan shonqüwan qamta mansapakunäpaq yanapaykalämay.

¹² Tayta Dios, lapan shonqüwanmi alabashayki. Jutikita joqarirmi imaypis adorashayki.

¹³ Noqataqa fiyupami kuyamanki. Wanuypitapis salvamashkankimi.

¹⁴ Tayta Dios, yaqa runakunami conträ sharkuyashpan wanusimayta munaykäyan. Say runakunaqa qamtapis manami imapaqpis cuentayäshunkisu.

¹⁵ Tayta Dios, qamqa ali shonqu y kuyapäkuqmi kaykanki. Juklaqa manami rabyakunkisu. Kuyapäkuq y rasun kaqlata parlaqmi kaykanki.

¹⁶ Manakamushqäta wiyamashpayki kuyapaykalämay. Sirviqniki kaykaptïqa valorta qoykalämay. Sirvishuqniki warmipa wawan kaykaptïqa salvaykalämay.

¹⁷ Conträkuna penqakuyänanpaq paykunapa rikay nawin yanapaykalämay. Tayta Dios, qamlami yanapämanki y kushikasimanki.