Salmo 83 - Tayta Diospa Wilakuynin

1

Salmo 83 (82) Chikiqninkunata ushakäsinanpaq manakushqan

1 (1) Cantanansipaqmi. Asaf qelqashqan salmu.

¹ 1 (2) Tayta Dios, favornïkuna sharkuykulay. Ama ari upäla rikaraykayämaysu.

² 2 (3) Chikishuqniki runakunami wajupaykäyäman. Qampapis contraykimi sharkuykäyan.

³ 3 (4) Kuyashqayki runakuna kaykäyaptïpis atacayämänanpaqmi wilanakuykäyan. Cuidashqayki runakuna kaykäyaptïpis conträmi sharkuykäyan.

⁴ 4 (5) Say runakunami nikäyan: <>.

⁵ 5 (6) Say yarpaylami lapanpis wilanakuyash contrayki sharkuyänanpaq.

⁶ 6 (7) Paykuna kaykäyan edomita runakuna, ismaelita runakuna, moabita runakuna y agareno runakunami.

⁷ 7 (8) Saynöpis kaykäyan Gebal runakuna, amonita runakuna, amalecita runakuna, filisteo runakuna y Tiro runakunami.

⁸ 8 (9) Lotpita miraqkunatami Asiria runakunapis yanapaykäyan. Selah

⁹ 9 (10) Paykunata wanurasiy madianita runakunata unay wanusishqaykino. Paykunata ushakäsiy Sísaratapis Jabíntapis Cisón raqra nawpancho ushakäsishqaykino.

¹⁰ 10 (11) Endorchömi paykunata ushakäsirqayki. Ayankunapis saychömi ismur jitaräyarqan.

¹¹ 11 (12) Orebta y Zeebta wanusishqaykino paykuna respitayashqan runakunatapis wanuykasilay. Zebata y Zalmunata wanusishqaykino mandaqnin reykunatapis wanuykasilay.

¹² 12 (13) Paykunami qoyämashqayki nacionta sarikurkuyta munaykäyan.

¹³ 13 (14) Tayta Diosnilä, shukukuy wayra imaykatapis ushashqanno conträ sharkuq runakunata ushakaykasilay. Wayra apashqan saki punshano kaykuyäläsun.

¹⁴ 14 (15) Muntita nina rupar ushaqno y jirkapa nina lätaypa lätar aywaqno

¹⁵ 15 (16) qampis waqya tamyaykiwan qatikachay y löcu wayraykiwan mansakäsiy.

¹⁶ 16 (17) Paykunata fiyupa penqayman churaykulay. Munayyuq kashqaykita musyayänanpaq sayno ruraykulay, Tayta Dios.

¹⁷ 17 (18) Imaypis penqaytukushla y mansakashla kayäsun. Sayno puriykäyashlancho ushakäyäsunpis.

¹⁸ 18 (19) Lapanpis musyaykuyäläsun qam japalayki poderyuq Tayta Dios kashqaykita. Tantiyaykuyäläsun kay pasacho lapanpaq munayyuq kashqaykita.