Salmo 80 - Tayta Diospa Wilakuynin

1

Salmo 80 (79) Yapay yanapänanpaq Tayta Diosta manakushqan

1 (1) Cantaqkunapa mandaqninpaqmi. Liriu waytakuna niyashqan cantupa tönunwan kay testimoniu salmuta cantayanki. Asaf qelqashqan salmu.

¹ 1 (2) Israel runakunapa misiqnin Tayta Dios, wiyaykayälämay. Uysha misiqnömi Josépita miraqkunata ali rikaykanki. Querubinkuna chawpincho jamarashqaykipita pasa wiyaykayälämay.

² 2 (3) Efraín, Manasés y Benjamín trïbu runakunata yanapaykulay. Shamur munaynikiwan salvaykayälämay.

³ 3 (4) Tayta Dios, nawpata yanapäyämashqaykinöla kananpis yanapaykayälämay. Mana rabyakuylapa salvaykayälämay.

⁴ 4 (5) Munayyuq Tayta Dios, kuyashqayki runakuna ruwakuyäshuptikipis ¡imayyaqraq rabyashla kaykanki!

⁵ 5 (6) Lakikuylawanmi shonqükunapis kutapakash kaykan. Seqaypa waqarmi weqiläkunata upuykäyäpis.

⁶ 6 (7) Vecïnü nación runakuna kushipäyämänanpaqmi kachariyämashkanki. Chikimaqnïkunapis asipaykäyämanmi.

⁷ 7 (8) Munayyuq Tayta Dios, nawpata yanapäyämashqaykinöla kananpis yanapaykayälämay. Mana rabyakuylapa salvaykayälämay.

⁸ 8 (9) Egiptupitami üva plantatapis apamurqayki. Juk nación runakunata qarquskirmi plantarqayki.

⁹ 9 (10) Chakrata shumaq kamariskir plantaptikimi ruriyaq jaqwäkurqan. Ali winarmi intëru nacionman juntarqan.

¹⁰ 10 (11) Copösuyarmi jirkakunatapis lantuyninwan saparqan. Rämankunawanmi jatusaq cedru jachakunatapis saparkurqan.

¹¹ 11 (12) Rämankunapis lamaryaqmi ayparqan. Chinkimushqanpis Éufrates mayuyaqmi charqan.

¹² 12 (13) Kananqa ¿imanirtaq qenchankunata taqurishkanki? Nänipa päsaq jäpa runakunapis lutami palakuyan.

¹³ 13 (14) Sima kuchikunapis panatarmi ushakuyan. Jirka uywakunapis mikurmi ushakuyan.

¹⁴ 14 (15) Munayyuq Tayta Dios, kutiykalämuy. Jana pasapita yanapaykayälämay. Shamur plantashqayki üvata shumaq rikaykulay.

¹⁵ 15 (16) Kikikimi say üvata plantarqayki. Sheqlimuqkuna shumaq winananpaq kikikimi uryarqayki.

¹⁶ 16 (17) Say üva plantaykitami chipyaq rupasir ushayash. Sayno rurayashqanpita castigaykulay.

¹⁷ 17 (18) Rey kananpaq churashqayki runata isanqa yanapaykulay.

¹⁸ 18 (19) Noqakunaqa qammanmi imaypis yärakayämushaq. Salvayämaptikimi jutikita joqarir imaypis alabayäshayki.

¹⁹ 19 (20) Munayyuq Tayta Dios, nawpata yanapäyämashqaykinöla kananpis yanapaykayälämay. Mana rabyakuylapa salvaykayälämay.