Salmo 8 - Tayta Diospa Wilakuynin

1

Salmo 8 Tayta Dios munayyuq kashqan y runakunata kuyashqan

1 (1) Cantaqkunapa mandaqninpaqmi. Üvata jarur cantayashqayki tönuwan kay salmuta cantayanki. David qelqashqan salmu.

¹ 1 (2) Tayta Diosnilä, kay pasacho imaykapaqpis munayyuqmi kaykanki. Jana pasachöpis qammanqa manami pipis tinkunsu.

² 2 (3) Pishi wamrakuna y chuchuykaq wamrakunapis alabayäshunkimi. Sayta rikarmi contrayki sharkuqkuna penqakur upälakuykäyan.

³ 3 (4) Jana pasatapis dëdulaykiwanmi rurashkanki. Killatapis qoyllarkunatapis makikiwanmi kamashkanki. Saykunata rikarmi

⁴ 4 (5) yarpachakü: <<¿Imanataq runa kaykan sayjinanpa paypaq yarpachakunaykipaq? ¿Imanataq runa kaykan aläpa kuyaykunaykipaq?>>

⁵ 5 (6) Runata kamashkanki cäsi angilno munayyuq kananpaqmi. Reytanöpis churashkanki munayyuq y respitash kananpaqmi.

⁶ 6 (7) Lapan kamashqaykitapis munayninmanmi churashkanki. Kay pasacho kaqkunataqa lapantami makinman churashkanki:

⁷ 7 (8) uyshakunata, wäkakunata, jirka uywakunata,

⁸ 8 (9) pajaqkunata, lamarcho pescädukunata y saycho kaq tukuy casta kawaqkunatapis.

⁹ 9 (10) Tayta Diosnilä, kay pasacho imaykapaqpis munayyuqmi kaykanki.