Salmo 74 - Tayta Diospa Wilakuynin

1a

Salmo 74 (73) Kuyashqan runakunata salvananpaq manakushqan

1a (1a) Asaf qelqashqan salmumi.

¹ 1 (1b) Tayta Dios, ¿japanlanasuraq kachariykayämashkanki? Majädaykicho uyshaykino kaykäyaptïqa ¿imanirtaq fiyupa rabyakurkushkanki?

² Unaypita akrashqayki runakuna kaykäyaptïqa yarparkayälämay. Herenciayki kayänäpaqmi salvayämarqayki. Sión lömacho tashqayki templu rayku yanapaykayälämay.

³ Templucho kaqkunatapis lapantami contraykikuna ushakäsiyash. Juchusiyashqanta rikanaykipaq shamuykulay.

⁴ Templuykita juchurkasirmi kushikuyashpan qaparäyash. Bandërankunatapis saymanmi jawikurkuyash.

⁵ Paykunaqa imayka muntita saquqnömi templuykita juchusiyash.

⁶ Tablakunacho kuyaylapaqta laqlaypa adornayashqantapis jächawan y pïcuwanmi ushakäsiyash.

⁷ Saynömi templuykita rupasir ushayash. Täkunayki templuta manakaqman churarmi lapanta juchusir ushayash.

⁸ Say runakunaqa chipyaq elaqäsiyämaytami yarpäyan. Kay nacionchöqa qamta adoranäpaq shuntakäyänä wayikunatapis lapantami rupasiyash.

⁹ Bandëraqkuna palpalyaqtapis mananami rikayänasu. Profëtakunapis mananami kayannasu. Manami musyayäsu imayyaq sayno kayänäpaq kashqantapis.

¹⁰ Tayta Dios, ¡imayyaqraq chikimaqnïkuna wajupaykäyämanqa! ¡Imayyaqraq washaykitapis rimaykäyanqa!

¹¹ ¿Imanirtaq yanapäyämankinasu? ¿Imanirtaq makiki oqlash rikaraykäyämanki?

¹² Tayta Dios, unaypita pasami mandamaqnï rey kaykanki. Kay markacho aska kutimi chikimaqnïkunata vincishkanki.

¹³ Lamar yakutapis munaynikiwanmi ishkayman rakirqayki. Lamarcho mansaypaq uywakunapa umantapis shaturqaykimi.

¹⁴ Leviatán waräkuypa umankunatapis lapirirqaykimi. Nirkurmi sunyaq jirkacho taq uywakuna mikuyänanpaq jitaparirqayki.

¹⁵ Mayu kananpaqmi yakutapis pashtasimurqayki. Mana sakiq mayukunatapis sakisirqaykimi.

¹⁶ Junaqtapis sakaytapis kamashkankimi. Killatapis intitapis kamashkankimi.

¹⁷ Pasa maypita mayyaq kananpaqpis señalta churashkankimi. Usya killatapis y tamya killatapis kamashkankimi.

¹⁸ Tayta Dios, contraykikuna ashliykäyäshunkimi. Yaqa runakuna contrayki parlayashqanta ama perdonaysu.

¹⁹ Noqakunataqa ama qonqaykayämaysu. Kulkushkunanömi pasaypa mansariyä. Jirka uywa niraq fiyu runakunapa makinman ama kachaykayälämaysu.

²⁰ Kay nacionchöqa maysaychöpis lutankunalatami ruraykäyan. Noqakunawan pactu rurashqaykita yarpar yanapaykalämay.

²¹ Nakasiyämänanta ama kachapaykulaysu. Pobrikuna y humildi kaqkuna alabayäshunaykipaq yanapaykulay.

²² Tayta Dios, makikicho kaykäyaptïqa jukla yanapaykayälämay. Say yaqa runakunaqa cadalami qampa contrayki sharkuykäyan.

²³ Chikishuqniki runakunaqa contraykimi imaypis parlaykäyan. Sayno kayashqanta rikaykarqa jukla yanapaykayälämay.