Salmo 73 - Tayta Diospa Wilakuynin

1a

Libru 3 Salmo 73—89 Salmo 73 (72) Tayta Diosman yärakushqan lapanpitapis mas ali kashqan

1a (1a) Asaf qelqashqan salmu.

¹ 1 (1b) Israel runakunataqa Tayta Dios kuyanmi. Shonqunkunacho imaypis alilata yarpaqkunataqa shumaqmi yanapan.

² Sayno kaykaptinmi noqaqa ichiklapa Tayta Diospita witikushkäsu.

³ Jusalikuq runakuna rïcuyäyashqanta rikarmi fiyupa envidiakurqä.

⁴ Paykunataqa manami qeshyalapis sarinsu. Wanuytapis manami yarpäyansu.

⁵ Wakin runakunanöqa manami nakayansu. Manami ima desgracialapis päsansu.

⁶ Runa tukuyashpanmi orgullösu puriykäyan. Runa mayinta atacayänanpaqpis kamarikushqami kaykäyan.

⁷ Imaykankunapis kaptinmi werayaylawan nawinkunapis saltananraq. Pasaypa lutan ruraykunalamanmi churakash kaykäyan.

⁸ Pïmaytapis manakaqmanmi churayan. Pitapis maqayänanpaq o wanusiyänanpaq juraparmi puriyan.

⁹ Tayta Diospa contranmi parlayan. Runa mayinpapis contranmi sharkuyan.

¹⁰ Sayno kaykäyaptinpis paykunataqa runakuna alabayanmi. Imata niyashqantapis criyiyanmi.

¹¹ Say yaqa runakunaqa nikäyan: <<¿Imanöpataq lapantaqa Dios musyanqa? ¿Imanöpataq jana pasacho kaykarqa rikaykamunman?>>

¹² Saynömi yaqa runakuna kaykäyan. Sayno karpis paykunaqa mana nakaylapami rïcuyaykäyan.

¹³ Noqaqa walälami mana jusalikuypa kawaykä. Yanqalapaqmi lutanta mana ruraypa kawaykä.

¹⁴ Waran waranmi mana alikuna päsaykäman. Cada tutami nakaykä.

¹⁵ Sayno kaptinpis say yarpashqäkunata manami parlaküsu. Saykunata parlarqa kuyashqayki runakunata rabyanäsïmanmi karqan.

¹⁶ Yaqa runakuna imanir ali kawayashqanta manami tantiyayta kamäpaküsu.

¹⁷ Tayta Diospa templunman aywarraqmi tantiyakurqä. Saychöraqmi say runakuna imano ushakäyänanpaq kayashqanta tantiyashkä.

¹⁸ Paykunaqa pasaypa peligruchömi kaykäyan. Ushakash kayänanpaqmi Tayta Dios destinash.

¹⁹ Paykunaqa elaqpitami asulash kayanqa. Mansariylawanmi ushakäyanqa.

²⁰ Runa sueñushqanta qonqashqannömi paykunapis qonqakash kayanqa. Sayno kayanqa castigaptikimi, Tayta Dios.

²¹ Shonqü pasaypa rabyanaptinmi jaqayash karqä.

²² Mana tantiyakuq upa runa karmi nawpaykicho uywano karqä.

²³ Sayno kaptïpis qammi yanapämanki. Aluq kaq makïpitami jancharämanki.

²⁴ Yäsikuynikiwanmi shumaq tantiyasimanki. Nirkurmi gloriaman pushakamankipaq.

²⁵ Jana pasachöpis qamlami salvamaqnï kaykanki. Kay pasachöpis makikicho karmi kushish kawashaq.

²⁶ Kalpä ushakaptinpis y shonqü fiyupa lakikuptinpis qammi imaypis valorta qoykämanki. Kikikimi herenciä imayyaqpis kaykanki.

²⁷ Qampita witikuqkunataqa ushakäsinkimi. Mana cäsukushuqnikikunataqa elaqäsinkimi.

²⁸ Noqami isanqa qamlaman imaypis yärakamushaq. Qamman yärakamushqäqa lapanpitapis mas alimi kaykan. Qammi kaykanki sapämaqnï, Tayta Dios. Yanapämashqaykitami pïmaytapis wilapäshaq.