Salmo 72 - Tayta Diospa Wilakuynin

1a

Salmo 72 (71) Mandaq reypaq Tayta Diosta manakushqan

1a (1a) Salomón qelqashqan salmu.

¹ 1 (1b) Tayta Dios, reyta yanapaykulay mandananpaq. Tantiyaykasilay mana jananpaypa pïmaytapis juzgananpaq.

² Sayno yanapaptikimi kuyashqayki runakunata ali mandanqa. Pobrikuna quejakuyashqantapis shumaqmi arreglanqa.

³ Saymi may jirkacho taqkunapis jawka kawayanqa.

⁴ Yanapaptikimi muchuqkunapa favornin sharkunqa, pobrikunapa surinkunata salvanqa y nakasiqkunata ushakäsinqa.

⁵ Mandaq rey imayyaqpis kawaykuläsun. Intipis y killapis mana ushakaq kashqanno mandaq kayninpis mana ushakaq kaykuläsun.

⁶ Murupakuypaq y qewapaq tamyapis shulyapis bendición kashqanno pïmaypaqpis bendición kaykuläsun.

⁷ Ali mandaptin lapanpis jawka kawaykuyäläsun. Jana pasacho killa ushakashqanyaq imayyaqpis mandaykuläsun.

⁸ Lamarpa kuchunpita jukaq kuchunyaq mandaykuläsun. Éufrates mayupita intëru munduyaq mandaykuläsun.

⁹ Sunyaq jirkacho taq contrankunapis paypa puntanman qonqurpakuyäsun.

¹⁰ Maysay nacionpitapis reykuna shamur qaraykunata apayämusun. Tarsis nacionpita, lamar simpancho kaykaq nacionkunapita, Sabá nacionpita y Seba nacionpitapis qaraykunata apakurkur shayämusun.

¹¹ Lapan reykuna puntanman qonqurpakuyäsun. Lapan nacioncho taq runakunapis payta sirviyäsun.

¹² Reyqa muchuqkuna manakuyaptin yanapanqami. Pïninpis mana kaqkunapapis favornin sharkunqami.

¹³ Humildikunataqa kuyapanqami. Muchuqkunataqa wanuypitapis sapanqami.

¹⁴ Nakasiq runakunapa makinpitapis jorqunqami. Maqakuq runakunapitapis salvanqami. Nakaycho kaq runakunata pasaypami kuyan.

¹⁵ Reyqa aska wata kawaykuläsun. Sabá nacionpita qorita apapäyämusun. Imaypis paypaq Tayta Diosta manakuyäsun. Paytaqa pïmaypis alabasun.

¹⁶ Mandashqan nacioncho trïgu shumaq wayuykuläsun. Intëru jirkakunachöpis kichkiyparaq kaykuläsun. Líbanuchönöraq loqluypa loqlur winaykuläsun. Runakunapis jachakunanöraq askaman mirayäsun.

¹⁷ Mandaq rey alita rurashqankunata imaypis yarparäyäsun. Ali rey kashqanta ama qonqayäsunsu. Lapan nacionkunapis paypita bendicionta chaskiyäsun. Maysaychöpis payta alabayäsun.

¹⁸ Israel runakunata kuyaq Tayta Dios alabash kaykuläsun. Paylami imaykatapis espantaypaq kaqkunata ruran.

¹⁹ Imayyaqpis alabash kaykuläsun. Munayyuq kashqanta intëru kay pasacho pïmaypis musyaykuläsun. ¡Amén! ¡Sayno kasun!

²⁰ Isaípa surin David manakur Tayta Diosta alabashqan kaychömi ushakan.