Salmo 71 - Tayta Diospa Wilakuynin

Salmo 71 (70) Awkin runa Tayta Diosta manakushqan

¹ Tayta Dios, qamlamanmi yärakamü. Runakuna jamuräyämänanta ama kachapaykulaysu.

² Alilata ruraq kaynikiwan salvaykalämay. Manakamushqäta wiyaykalämay. Jukla salvaykalämay.

³ Pakakunä qaqa kaykulay. Qammanmi imaypis amparakamü. Salvamänaykipaq kashqanta musyarmi yärakamü. Qammi sapämaqnï qaqa y amparakunä törri kaykanki.

⁴ Tayta Dios, achkay runakunapita sapaykalämay. Jusasapakunapita y wanusikuq runakunapita salvaykalämay.

⁵ Yärakamuptïmi ima desgraciapitapis sapämanki. Maqta kashqäpita pasami qamman yärakamushkä.

⁶ Mamäpa pachancho kaykaptïpis noqawanmi kaykashkanki. Qam munaptikimi yurishkäpis. Saymi imaypis alabashayki.

⁷ Lapanchöpis yanapämaptikimi wakin runakunapis noqano kawayta munaykäyan.

⁸ Lapanpaq munayyuq kaptikimi waran waran alabaykälar qoyarkü.

⁹ Awkinna kaptïpis ama qonqaykalämaysu. Kalpä manana kaptinpis ama kachaykalämaysu.

¹⁰ Wanusimayta munaqkunaqa shuntakaykurmi conträ wilanakuykäyan.

¹¹ Paykuna nikäyan: <>.

¹² Tayta Dios, noqapita ama witikuysu. Jukla shamur yanapaykalämay.

¹³ Chikipämaqkunaqa penqaypaq wanusish kaykuyäläsun. Conträ sharkuqkunataqa kikinkunata asipaykuyäläsun.

¹⁴ Noqaqa imayyaqpis qamlatami shuyaraykäshayki. Waran waranmi alabashayki.

¹⁵ Qoyayninpami kuyapämar salvayämashqaykita wilakushaq. Ayka kuti salvamashqaykitapis manami yupayta atipäsu.

¹⁶ Admiraypaq rurashqaykitami wilakushaq. Japalayki imaypis ali ruraq kashqaykitami pïmaytapis wilapäshaq.

¹⁷ Tayta Dios, maqta kashqäpita pasami yachasimashkanki. Saymi admiraypaq rurashqaykikunata kananyaqpis wilakuykä.

¹⁸ Kanan wisan runakunata y paykunapita miraqkunatapis wilapäshaqraqmi. Awkinyar soquyash kaptïpis ama kachaykalämaysu.

¹⁹ Tayta Dios, manami pipis qamno alilata ruraq kansu. Admiraypaqkunatami rurashkanki. Manami pipis qammanqa tinkunsu.

²⁰ Fiyupa nakayman y lakikuyman churarkamarpis yapaymi ali kawanäpaq yanapämanki. Wanunäpaqna kaykaptïpis yapaymi sharkasimankipaq.

²¹ Munayyuq kanäpaqmi yanapämankipaq. Yapaymi kushikasimankipaq.

²² Israel runakunapa santu Diosnin, sayno yanapämashqaykipitami arpakunata y salteriukunata tukapalanpa adorashayki. Himnukunata cantarmi alabashayki.

²³ Salvamashqaykipitami lapan shonqüwan kushish alabashayki.

²⁴ Desgracia päsamänanta munaqkunaqa pasaypa penqakushqami kaykäyan. Saymi ali ruraq kashqaykita imay hörapis parlaykäshaq.