Salmo 7 - Tayta Diospa Wilakuynin

1

Salmo 7 Chikiqninkunata juzgananpaq Tayta Diosta manakushqan

1 (1) Kay salmuta David cantarqan Benjamín trïbu Cus jutiyuq runa contran sharkush kaptinmi.

¹ 1 (2) Tayta Diosnilä, qamlamanmi yärakamü. Chikiyämar qatikachämaqkunapita sapaykalämay.

² 2 (3) Mana sapämaptikiqa león rachiykar ushaqnöchir ushaykayämanqa. Qam mana salvamaptikiqa ¿piraq salvaykamanqa?

³ 3 (4) Tayta Dios, ¿imatataq mana alita rurashkä? ¿Imatataq jusalikushkä?

⁴ 4 (5) ¿Amïgütasuraq rabyanäsishkä? ¿Conträ runakunatasuraq jaqayäsishkä?

⁵ 5 (6) Sayno kash kaptïqa conträkuna maypapis qatipäyämäsun. Taripaykamar qarachash purisiyämäsun. Pasaypa penqayman churayämäsun. Selah

⁶ 6 (7) Tayta Dios, rabyashpayki chikimaqnïkunapa contran sharkuykulay. Favornï sharkushpayki paykunata castigaykulay.

⁷ 7 (8) Maysay nación runakunapis nawpaykiman shuntakäyämusun. Paykunata juzganaykipaq trönuykiman jamaykulay.

⁸ 8 (9) Qammi maysay nación runakunata juzgankipaq. Runakunapa contranta imatapis mana rurash kaykaptïqa favornï sharkuykulay.

⁹ 9 (10) Pïmaytapis mana jananpaypa juzgaq Tayta Dios, runakuna imata yarpäyashqantapis musyaykankimi. Jusalikuqkuna amana mas jusalikuyäsunnasu. Jusaynaq runakunataqa yanapaykulay.

¹⁰ 10 (11) Mana alikunapita sapämänanpaq Tayta Diosmi escüdü kaykan. Paymi ali shonqu runakunata salvan.

¹¹ 11 (12) Jusalikushqanman tupumi pitapis Tayta Dios castigan. Payqa mana jananpaypami jusalikuqkunata imaypis juzgan.

¹² 12 (13) Jusalikuyta runa mana kachariptinqa castigananpaq espädan aptashqami kaykan. Flëchanwan flëchananpaqpis kamarikushnami kaykan.

¹³ 13 (14) Jusalikuqta ushakäsinanpaqmi armankuna kaykan. Nina ninaykaq flëchankunapis apuntaraykäyanmi.

¹⁴ 14 (15) Tantiyakuyay jusalikur kawaq runakuna imano kawayashqantapis. Paykunaqa yarpachakuyan mana alikunata rurayänalanpaqmi. Runa mayinta imaypis lulapaykäyanmi.

¹⁵ 15 (16) Nakayänanpaq kikinkunami jusayuq kaykäyan. Kikinkuna uchkuyashqan pözuman jeqaqnömi kayanqa.

¹⁶ 16 (17) Jusalikuyashqanpitami paykunaman castïgu chanqa. Runa mayinta nakasiyashqanpita kikinkunatami nakasiyanqa.

¹⁷ 17 (18) Pïmaytapis mana jananpaypa juzgashqanpitami Tayta Diosta imaypis alabashaq. Poderyuq Tayta Diostami kushish imaypis alabashaq.