Salmo 68 - Tayta Diospa Wilakuynin

1

Salmo 68 (67) Chikiqninkunata Tayta Dios vincishqanpita alabashqan

1 (1) Cantaqkunapa mandaqninpaqmi. David qelqashqan salmu. Cantanansipaqmi.

¹ 1 (2) Favornïkuna sharkuykulay, Tayta Dios. Contraykikuna mashipa mashir qeshpiyäsun. Chikishuqnikikunapis nawpaykipita qeshpir aywakuyäsun.

² 2 (3) Wayra apaptin qoshtay elaqaqno elaqäyäsun. Ninacho cëra suluqno ushakäyäsun. Jusalikuqkunapis nawpaykicho ushakäyäsun.

³ 3 (4) Alita ruraqkuna isanqa kushikuyäsun. Nawpaykicho kushish kawayäsun. Kushikuypita saltaykachäyäsun.

⁴ 4 (5) Tayta Diosta alabayay. Himnukunawan alabar jutinta joqariyay. Paymi pukutaynin loqash purin. Paypa jutinqa Yahwehmi. ¡Paypa nawpancho kushikuyay!

⁵ 5 (6) Tayta Diosqa sagrädu templunchömi taykan. Paymi waksakunapa papänin kaykan. Paymi viüdakunapa favornin sharkun.

⁶ 6 (7) Aylluynaqkunataqa Tayta Diosmi yanapan castayuqno kayänanpaq. Prësukunata jorqurkurmi yanapan imaykayuqpis kayänanpaq. Mana wiyakuq runakunataqa churan saki jirkacho taykaqno nakayänanpaqmi.

⁷ 7 (8) Tayta Dios, kuyashqayki runakunatami Egiptupita yarqayämunanpaq yanaparqayki. Nirkurmi sunyaq jirkapa pushamurqayki. Selah

⁸ 8 (9) Pasapis fiyupami suksukyarqan. Tamyapis palchachayparaqmi tamyamurqan. Tayta Dios saycho kaptinmi Sinaí jirkapis kuyurqan. Payqa Israel runakunata kuyaq Tayta Diosmi kaykan.

⁹ 9 (10) Tayta Dios, tamyatapis alimi tamyasimushkanki. Qachpayash chakratapis ali wayuq chakramanmi tikrasishkanki.

¹⁰ 10 (11) Kuyashqayki runakuna kayaptïmi saycho täyänäpaq churayämashkanki. Kuyayämashpaykimi pishïpakuyaptïpis yanapäyämashkanki.

¹¹ 11 (12) Tayta Dios kachaptinmi aska warmikuna wilakuyarqan:

¹² 12 (13) <<¡Contransi reykunapis soldädunkunawan qeshpirmi aywakuyash!>> nir. Contrankunapita apayashqantami wayinkunacho warmikuna rakipänakuyarqan.

¹³ 13 (14) Uywankunata täpaqkunapis paluma niraq adornukunatami chaskiyarqan. Say adornukuna kaykan qellaypita rurash riprayuq y qoripita rurash plümayuqmi.

¹⁴ 14 (15) Lapanpaq munayyuq Tayta Dios mansakäsiptinmi say reykuna qeshpikuyarqan. Sayno qeshpiyashqanmi karqan Salmón puntacho rashtata wayra apashqanno.

¹⁵ 15 (16) Basán jirkakunaqa pasaypami liwliwyaykan. Puntankunapis selläma altumi.

¹⁶ 16 (17) Altunnin jirkakuna, ¿imanirtaq chikir rikapäyanki Tayta Dios tashqan Sión lömata? ¡Saychömi Tayta Dios imayyaqpis tanqa!

¹⁷ 17 (18) Tayta Diospa guërra carrëtankunaqa yupaytapis mana atipaypaqmi. Say carrëtankunawanmi Sinaí jirkapita templunman shamush.

¹⁸ 18 (19) Prësukunata apamushpaykimi wisämushkanki, Tayta Dios. Runakuna apayämushqan qaraykunatami chaskishkanki. Mana cäsukuq runakunapis munaynikichönami kaykäyan. Paykuna täyashqanchönami taykanki.

¹⁹ 19 (20) ¡Salvakuq Tayta Dios alabash kaykuläsun! Paymi waran waran yanapämansi. Selah

²⁰ 20 (21) Tayta Diosninsiqa salvakuq Diosmi. Wanuypitapis paymi salvamansi.

²¹ 21 (22) Tayta Diosqa contrankunapa umantapis pakirinqami. Jusalikuylacho kawaqkunapa umantapis shalurinqami.

²² 22 (23) Tayta Diosmi nin: <

²³ 23 (24) Sayno rurashaq yawarninwan chakikita maylayänaykipaq y alquykikunapis yawarninta laqwayänanpaqmi>>.

²⁴ 24 (25) Mandamaqnï Tayta Dios, saysika runakunami adoraykäyäshunki. Qatinaylanpami templuykiman yaykuykäyan.

²⁵ 25 (26) Puntatami cantaqkuna aywaykäyan. Qepantanami tukaqkuna aywaykäyan. Chawpintanami jipashkuna panderëtakunata tukaraykar aywaykäyan.

²⁶ 26 (27) ¡Lapayki Tayta Diosta alabayay! ¡Israel runakuna, lapayki shuntakaykur alabayay!

²⁷ 27 (28) Puntantami nunush Benjamín trïbu runakuna aywaykäyan. Paykunawanmi aywaykäyan Judá, Zabulón y Neftalí trïbukunapita askaq mandaqkuna.

²⁸ 28 (29) Tayta Dios, munayyuq kashqaykita tantiyaykasiyälämay. Nawpata yanapäyämashqaykino yapaypis yanapaykayälämay.

²⁹ 29 (30) Jerusalén templuykimanmi reykuna qaraykunata apayämunqa.

³⁰ 30 (31) Guërralaman uman churakash runakunata castigaykulay. Paykunaqa ututukunacho pakakuykur atacakuq uywanömi kaykäyan. Saynöpis waqraq törukunanömi kaykäyan. Rïcu kayta munarmi nacionkunata atacar imaykantapis apakuyan. Sayno kaqkunataqa lapantapis ushakaykasilay.

³¹ 31 (32) Egiptupitami Faraónpa kachankuna shayämunqa. Etiopía nación runakunami Tayta Diosta alabayanqa.

³² 32 (33) Kay pasacho lapan nación runakuna, Tayta Diosta alabayay. Himnukunata cantar payta alabayay. Selah

³³ 33 (34) Tayta Diosqa loqashqami jana pasapa purin. Parlamushqanpis maysaymanmi wiyakämun.

³⁴ 34 (35) Tayta Dios munayyuq kashqanpita alabayay. Payqa munayninwanmi Israel runakunata yanapan. Azulyaraykaq ciëluchöpis munayyuqmi kaykan.

³⁵ 35 (36) Templuncho Tayta Dios kushikuypaqmi kaykan. Kuyashqan Israel runakunataqa munayninwanmi yanapan. ¡Tayta Dios alabash kaykuläsun!