Salmo 61 - Tayta Diospa Wilakuynin

1

Salmo 61 (60) Mana alikunapita sapänanpaq Tayta Diosta manakushqan

1 (1) Cantaqkunapa mandaqninpaqmi. Cuerdayuq instrumentuta tukar cantayanki. David qelqashqan salmu.

¹ 1 (2) Tayta Dios, qayakamushqäta wiyaykalämay. Manakamushqäta chaskiykalämay.

² 2 (3) Valornï manana kaptinmi shonqüpis ushakaykanna. Markäpita pasaypa karucho kashpämi qamta manakamü. Altunnin qaqaman pakaykalämay.

³ 3 (4) Qammi kanki pakakunä törri. Qammi kanki chikimaqnïkunapita sapämaqnï.

⁴ 4 (5) Sagrädu tolduykichömi imaypis täkuyta munaykä. Saychömi ripraykiwan imapitapis sapämanki. Selah

⁵ 5 (6) Lapan promitishqätami qam musyaykanki, Taytay. Qamta mansapakushuqnikikuna chaskiyänanpaq kaq herenciatami qomashkanki.

⁶ 6 (7) Mandaq rey aska wata kawananpaq yanapaykulay. Payqa imayyaqpis kawaykuläsun.

⁷ 7 (8) Bendicionnikiwan imaypis mandaykuläsun. Mana kachaypa imapitapis sapaykulay.

⁸ 8 (9) Sayno yanapashqaykipitami imaypis alabashayki. Qamta lapan promitishqätapis waran waranmi cumplishaq.