Salmo 53 - Tayta Diospa Wilakuynin

1

Salmo 53 (52) Jusalikuylacho runa kawashqan

1 (1) Cantaqkunapa mandaqninpaqmi. Mahalat. David qelqashqan salmumi.

¹ 1 (2) Mana tantiyakuq runakunaqa <> nirmi shonquncho yarpäyan. Paykunaqa lutan rurayman uman churakashqami kaykäyan. Rurashqankunapis pasaypa melanaypaqmi kaykan. Paykuna mayqanpis manami alitaqa rurayansu.

² 2 (3) Tayta Diosqa jana pasapita pasami runakunata rikaykämun. Paymi ashiykan pitapis tantiyakuqta. Saynölami ashiykan pitapis payta ashiqta.

³ 3 (4) Nishqan kaqqa lapan runakunapis jusalikurmi kawaykäyan. Lapanpis lutantami ruraykäyan. Pipis manami kansu alita ruraqqa. Ni juklaylapis manami kansu.

⁴ 4 (5) Yaqa runakunaqa ¿manasuraq imaylapis tantiyakuyan? Paykunaqa tantata mikuqnömi Tayta Dios kuyashqan runakunata ushakäsiyan. Tayta Diosta manami imaypis manakuyansu.

⁵ 5 (6) Paykunaqa imapis mana kaykaptinmi pasakaqtaraq mansakäyanqa. Tayta Diosmi paykunata chikir penqayman churanqa. Wanurkasirmi tulunkunata wakpa kaypa mashtanqa.

⁶ 6 (7) ¡Ima aliraq kanman Siónpita pasa Israel runakunata Tayta Dios salvaptin! Salvaptinmi Jacobpita miraq Israel runakuna seqaypa kushikuyanqa.