Salmo 51 - Tayta Diospa Wilakuynin

1-2

Salmo 51 (50) Jusanpita perdonananpaq manakushqan

1-2 (1-2) Cantaqkunapa mandaqninpaqmi. Betsabéwan David adulteriucho kashqanpitami profëta Natán olqutuparqan. Saymi jusalikushqanpita pësakur kay salmuta David qelqarqan.

¹ 1 (3) Kuyapäkuq Tayta Dios, perdonaykalämay. Kuyapäkuq kaynikiwan jusalikushqäta qonqaykulay.

² 2 (4) Lutanta rurashqäpita maylaykalämay. Jusalikushqäpita perdonaykalämay.

³ 3 (5) Mana wiyakuq kashqäta tantiyakümi. Jusalikushqäta manami qonqayta kamäpaküsu.

⁴ 4 (6) Jusalikur qampa contraykimi rikakushkä. Qamta mana cäsukushpämi rabyanäsishkä. Saymi conviëniqcho juzgaykämanki. Imano sapakuytapis manami kamäpaküsu.

⁵ 5 (7) Yurishqäpita pasami jusasapa kaykä. Jusayuqtami mamäpis wachamash.

⁶ 6 (8) Jusalikushqanta reconöcikuqtaqa qam kuyankimi. Jusalikushqäta qammi shonqücho tantiyasimanki.

⁷ 7 (9) Hisöpu jachawan purificamaptikiqa limpiumi kashaq. Maylamaptikiqa rashtapitapis mas yuraqmi kashaq.

⁸ 8 (10) Kushikuyta shonqüman churaykalämuy. Lakikuyman churamash karpis yapay kushikaykasilämay.

⁹ 9 (11) Jusalikushqäpita perdonaykalämay. Lutan rurashqäta ama yarparaykulaysu.

¹⁰ 10 (12) Munashqaykino kawanäpaq ali shonquta qoykalämay, Tayta Dios. Nimashqaykita imaypis cäsukunäpaq yanapaykalämay.

¹¹ 11 (13) Nawpaykipita ama qarqariykalämaysu. Espíritu Santuykitapis ama qechuykalämaysu.

¹² 12 (14) Salvamashqaykipita yapay kushish kawanäpaq yanapaykalämay. Cäsukuq kanäpaq tantiyaykasilämay.

¹³ 13 (15) Saynöpami mana wiyakuq runakunata wiyakuyäshunaykipaq tantiyasishaq. Jusalikuykunata kacharirmi qamtana cäsukuyäshunki.

¹⁴ 14 (16) Salvamaqnï Tayta Dios, runa mayïta wanusishqäpita perdonaykalämay. Perdonamashqaykipitami kushish imaypis alabashayki.

¹⁵ 15 (17) Lapan shonqüwan qamta alabanäpaq yanapaykalämay.

¹⁶ 16 (18) Sacrificiuta apamunäta manami munankisu. Apamunäta munaptikiqa apamümanmi.

¹⁷ 17 (19) Sacrificiuta apamunäpa trukanqa jusalikuyta wanakur lapan shonqüwan wiyakunätami munanki. Jusalikushqanpita lakikuqkunataqa kuyapankimi, Tayta Dios.

¹⁸ 18 (20) Siónta kuyapaykulay. Jerusalénpa murällanta alsaykulay.

¹⁹ 19 (21) Saymi nishqaykino sacrificiukunata rupasiyäshaq. Turïtukunatami altarnikichöpis rupasiyäshaq.