Salmo 48 - Tayta Diospa Wilakuynin

1

Salmo 48 (47) Sióncho Tayta Dios tashqan

1 (1) Cantanapaq. Corépita miraqkuna qelqayashqan salmu.

¹ 1 (2) Tayta Diosninsiqa munayyuqmi kaykan. Tashqan markacho payta imaypis alabashun. Sagrädu lömacho payta imaypis adorashun.

² 2 (3) Sión lömaqa kuyaylapaqmi kaykan. Say lömata rikarmi intëru kay pasacho runakuna kushikuyan. Nortilächömi say löma kaykan. Lapanpaq munayyuq Reymi saycho taykan.

³ 3 (4) Tayta Diosmi rikachakuna törrikunapita Jerusalén markata rikaykan. Paymi Jerusaléncho taqkunata imapitapis sapan.

⁴ 4 (5) Mandaq reykunami shuntakaykur Jerusalénta atacaq aywayarqan.

⁵ 5 (6) Tayta Dios cuidaykashqanta rikaykurmi pasaypa jupaylashno rikakuyarqan. Ima ruraytapis mana kamäpakuyashpanmi jinan höra qeshpir aywakuyarqan.

⁶ 6 (7) Warmita wachay nanay sarishqannömi paykunata pasaypa mansariy sarirqan.

⁷ 7 (8) Tarsispita shamuq büquikunata huracán wayra pasaypa ushakäsishqannömi say runakunata ushakäsishkanki.

⁸ 8 (9) Lapanta mandaq Tayta Diosninsi tashqan markacho sayno päsashqanta rikashkansimi. Saynölami unay päsashqantapis wilamashkansi. Tayta Diosmi Jerusalénta imaypis cuidanqa. Selah

⁹ 9 (10) Tayta Dios, templuykiman shuntakarmi kuyakuq kashqaykita yarpäyä.

¹⁰ 10 (11) Munayyuq kashqaykita musyarmi intëru kay pasachöpis alabaykäyäshunki. Munayyuq karmi imaypis alilata ruranki.

¹¹ 11 (12) Sión lömachöpis kushikuyäsun. Judá markakunachöpis kushikuyäsun. Runakunata mana jananpaypa juzgashqaykipita kushikuyäsun.

¹² 12 (13) Sión lömata tumapäyay. Ayka törrikuna kashqantapis yupayay.

¹³ 13 (14) Marka murällatapis y amparakuna wayinkunatapis shumaq rikapäyay. Waray warantin qepa yuriqkunatapis imano kayashqanta wilapäyänaykipaq rikapäyay.

¹⁴ 14 (15) Tayta Diosqa imaypis Diosninsimi kaykan. Wanushqansiyaqpis paymi rikaykämansi.