Salmo 44 - Tayta Diospa Wilakuynin

1

Salmo 44 (43) Yanapänanpaq Tayta Diosta manakushqan

1 (1) Cantaqkunapa mandaqninpaqmi. Corépita miraqkuna qelqayashqan salmumi.

¹ 1 (2) Tayta Dios, awilükunami wilayämash espantaypaq kaqkunata rurar unay ayllükunata imano yanapashqaykitapis.

² 2 (3) Kay nacioncho täyänanpaqmi unay runakunata qarqur ushakäsishkanki.

³ 3 (4) Manami kikinpa kalpanwansu kay nacionta sarikurkuyarqan. Ni espädawan atacarsu kaycho taq runakunata ushayarqan. Saypa trukanqa kikikimi aluq kaq makikiwan vincishkanki. Unay ayllükunata kuyashpaykimi yanapashkanki.

⁴ 4 (5) Tayta Dios, qammi mandamaqnï rey kaykanki. Qammi yanapäyämashkanki conträkunata munaynïman churayänäpaq.

⁵ 5 (6) Yanapäyämaptikimi conträkunata vinciykäyä. Qampa jutikichömi atacamaqkunata ushakaykäsiyä.

⁶ 6 (7) Vinciyänäpaqqa manami flëchakunämansu yärakuyä. Saynöpis manami espädäsu salvayäman.

⁷ 7 (8) Qam yanapäyämaptikimi conträkuna makïcho kaykäyan. Qammi chikimaqnïkunata penqayman churashkanki.

⁸ 8 (9) Saymi qamta imaypis kushish agradëcikuyäshayki. Jutikita joqarirmi imaypis alabayäshayki. Selah

⁹ 9 (10) ¿Imataq päsash, Tayta, kanan kachariykayämänaykipaq? Kachariykayämaptiki pasaypa penqakushqami puriykäyä. Soldädükunatapis mananami yanapaykankinasu.

¹⁰ 10 (11) Atacayämänanpaq conträkunata yanapaptikimi qeshpir aywakuyashkä. Saymi paykunaqa yaykaykamur imatapis munashqan kaqta apakuyash.

¹¹ 11 (12) Pishtananpaq kaq uyshatanömi conträkunapa makinman churayämashkanki. Juklä nacionkunacho mashtakash kayänäpaqmi qarqariykayämashkanki.

¹² 12 (13) Kuyashqayki runakuna kaykäyaptïmi barätulacho rantikayämashkanki. Rantikamashqaykiwan manami imatapis jorqushkankisu.

¹³ 13 (14) Pïmaypis ashliyämänanpaqmi kachariykayämashkanki. Saymi juklä nacionkuna wajupäyämashpan manakaqman churayäman.

¹⁴ 14 (15) Say nación runakuna jamuräyämänanpaqmi kachariykayämashkanki. Rikäriyämashpanmi umantapis jaqtayan.

¹⁵ 15 (16) Saymi imay hörapis pasaypa penqakuyä. Qaqläkunapis pasaypa almatakashqami kaykäyä.

¹⁶ 16 (17) Sayno rikakuyä conträkuna chikiyämaptin y ashliyämaptinmi.

¹⁷ 17 (18) Saykuna päsaykäyäman pactu rurashqansita cumpliykäyaptïpis.

¹⁸ 18 (19) Nishqaykikunata imaypis mana qonqaypami cumpliyashkä.

¹⁹ 19 (20) Sayno ruraykäyaptïpis miseriamanmi qaykariykayämashkanki. Pasaypa mansariypaq sakaychöno kayänäpaqmi kachariykayämashkanki.

²⁰ 20 (21) Qamta adorayänäpa trukanqa juk diosta adorayaptïqa

²¹ 21 (22) musyankimanmi karqan. Qamqa lapantami musyanki, Tayta Dios.

²² 22 (23) Munashqaykino kawayaptïmi chikiyämashpan imaypis wanusiyäman. Pishtayänanpaq kaq uyshanömi kaykäyä.

²³ 23 (24) ¡Rikchay, Tayta Dios! ¿Imanirtaq punukash kaykanki? ¡Amana kachariykayämaysu!

²⁴ 24 (25) ¿Imanirtaq noqakunapita pakakunki? ¿Imanirtaq qonqaykayämashkanki? ¡Imano nakasiyämashqantapis rikaykulay!

²⁵ 25 (26) Chikimaqnïkuna munayninman churayämaptinmi ima ruraytapis kamäpakuyänasu. Penqakuylawanmi uysukash puriykäyä.

²⁶ 26 (27) Yanapaykayälämayna, Taytay. Kuyapäyämashpayki salvaykayälämay.