Salmo 42 - Tayta Diospa Wilakuynin

1

Libru 2 Salmo 42—72 Salmo 42 (41) Yakunaypanöraq Tayta Diosta ashishqan

1 (1) Cantaqkunapa mandaqninpaqmi. Corépita miraqkuna qelqayashqan salmumi.

¹ 1 (2) Yakunash luychu yakuta ashishqannöraqmi noqapis qamta ashï, Tayta Dios.

² 2 (3) Imayyaqpis kawaq Dios kaptikimi yakunaypanöraq qamta ashiykä. ¡Imayraq nawpaykiman chämushaq qamta adoranäpaq!

³ 3 (4) Runakunami imay hörapis asipaykäyäman: <<¿maytaq Diosniki?>> nir. Saymi aläpa lakikur mikanäpissu. Wararküpis qoyarküpis waqaykälarmi.

⁴ 4 (5) Nawpataqa aska runakunata pushakurkurmi Tayta Diospa wayinman aywaq kä. Saychömi fiestata rurar Tayta Diosta kushish alabaq kä. Sayno kashqäta yarparkurmi fiyupa lakikü.

⁵ 5 (6) Ay vïdala vïda, ¿imanirtaq turbatä? ¿Imanirtaq lakikü? Tayta Dioslamanmi imaypis yärakushaq. Paytami imaypis alabashaq. Paymi salvamaq Tayta Diosnï.

⁶ 6 (7) Imata ruranäpaqpis gänasnï manami kannasu. Hermón y Mizar puntakunapita Jordán mayu qalaykamuqcho kaykarpis qamlatami yarparaykä.

⁷ 7 (8) Manana yanapämaptikimi pasaypa lakish kaykä. Bunyaypa bunyar mayu aywar mansariypaq kashqannömi lakikuynïpis kaykan.

⁸ 8 (9) Sayno kaptinpis Tayta Diosmi kuyakuq kashqanta waran waran tantiyasiman. Sakaypapis alabanäpaqmi yanapäman. Kawayta qomaqnï Tayta Diostami lapan shonqüwan manakü.

⁹ 9 (10) Imapitapis sapämaq Tayta Diosnïta manakurmi nï: <<¿Imanirtaq qonqaykalämashkanki? Conträ sharkuyaptinpis lakish mana purinäpaq yanapaykalämay>>.

¹⁰ 10 (11) Chikimaqnïkuna waran waranmi nikäyäman: <<¿Maychötaq Diosniki kaykan?>> Sayno nir asipäyämaptin toqshüyaqraqmi nanaypis chaykun.

¹¹ 11 (12) Ay vïdala vïda, ¿imanirtaq turbatä? ¿Imanirtaq lakikü? Tayta Dioslamanmi imaypis yärakushaq. Paytami imaypis alabashaq. Paymi salvamaq Tayta Diosnï.