Salmo 34 - Tayta Diospa Wilakuynin

1

Salmo 34 (33) Yanapäkuq kashqanpita Tayta Diosta alabashqan

1 (1) Kay salmuqa David qelqashqanmi. Qelqashqan wisanmi rey Abimelecpa nawpancho löcu tukurqan. Saymi Abimelecqa markanpita Davidta qarqurqan.

¹ 1 (2) Tayta Diostami imay hörapis agradëcikushaq. Paytami imaypis alabashaq.

² 2 (3) Tayta Diosman yärakur seqaypami kushikü. Alabaykashqäta wiyamar humildi kaqkunapis kushikuyäsun.

³ 3 (4) Tayta Diosta lapansi alabashun. Juk yarpayla jutinta joqarishun.

⁴ 4 (5) Ruwakuptïmi Tayta Dios wiyamash. Mansariptïpis paymi valorta qomash.

⁵ 5 (6) Tayta Diosman yärakuqkunaqa kushishqami kaykäyan. Paykunaqa imaypis manami penqayman churashsu kayanqa.

⁶ 6 (7) Lakikur qayakuptïmi Tayta Dios wiyamash. Yanapämaptinmi lakikünasu.

⁷ 7 (8) Tayta Diosta mansapakuqkunataqa angilninmi ima peligrupitapis sapan.

⁸ 8 (9) Kuyakuq kashqanta musyayänaykipaq Tayta Diosman yärakuyay. Payman yärakurqa kushishqami kawayankipaq.

⁹ 9 (10) Tayta Dios munashqanno kawaq santu runakuna, payta mansapakushun. Payta mansapakuqkunapaqqa manami imanpis pishinqasu.

¹⁰ 10 (11) Muchuy kaptinqa leonkunapis malaqäyanmi. Tayta Diosta ashiqkunami isanqa lapan nistäyashqanta tariyan.

¹¹ 11 (12) Kuyay wamräkuna, yachasishqäta wiyayänaykipaq shayämuy. Tayta Diosta mansapakuyänaykipaqmi yachasiyäshayki.

¹² 12 (13) Aska wata kawayta munarqa y kushish kawayta munarqa

¹³ 13 (14) lutankunata ama parlayaysu. Saynöla imaypis ama lulakuyaysu.

¹⁴ 14 (15) Lutankunata rurayänaykipa trukanqa alilata rurayay. Rimanakuyänaykipa trukanqa piwanpis ali kawayay.

¹⁵ 15 (16) Alilata ruraqkunataqa Tayta Dios imaypis rikanmi. Manakuyashqantapis wiyanmi.

¹⁶ 16 (17) Mana ali ruraqkunatami isanqa rikaytapis munansu. Rabyashpanmi paykunata chipyaq elaqäsinqa.

¹⁷ 17 (18) Ali runakuna manakuyaptin Tayta Dios wiyanmi. Ima nakaycho kayaptinpis pay yanapanmi.

¹⁸ 18 (19) Jusalikuyashqanpita lakikuqkunataqa Tayta Dios kuyapanmi. Ima ruraytapis mana kamäpakuqkunata pay yanapanmi.

¹⁹ 19 (20) Diosta cäsukuq runapaqqa imalapis lakikunanpaq kaykanmi. Sayno kaptinpis Tayta Dios imaypis yanapanmi.

²⁰ 20 (21) Paytaqa mana alikunapita sapanmi. Manami ni juk tululanpis pakishsu kanqa.

²¹ 21 (22) Yaqa runakunaqa mana alita rurayashqanpitami wanuyanqa. Ali runata chikiq kaqqa castigashqami kanqa.

²² 22 (23) Sirviqninkunatami isanqa Tayta Dios wanuypita salvanqa. Payman yärakuqkunaqa manami castigashsu kayanqa.