Salmo 30 - Tayta Diospa Wilakuynin

1

Salmo 30 (29) Tayta Diosta agradëcikur alabashqan

1 (1) Diospa wayinta inaugurarmi kay salmuta cantayarqan. David qelqashqan salmu.

¹ 1 (2) Conträkunapita salvamashqaykipitami qamta alabä, Tayta Dios. Manami kachapashkankisu chikimaqnïkuna kushipäyämänanta.

² 2 (3) Ruwakur manakamuptï aliyäsimashkankimi, Tayta Dios.

³ 3 (4) Qammi wanuypita salvamashkanki. Wanunäpaq kaykaptïmi libramashkanki.

⁴ 4 (5) Tayta Dios munashqanno kawaqkunaqa, payta alabayay. Salmukunata cantar santu Diosta alabayay.

⁵ 5 (6) Rabyarpis payqa rätulami rabyaskin. Kuyakuq kayninqa imayyaqpis kaykanmi. Saymi sakaypa waqarpis kushishna wararkamunsi.

⁶ 6 (7) Ali kawanäpaq yanapämaptikimi yarparqä imapis mana päsamänanpaq kashqanta.

⁷ 7 (8) Kuyamashpaykimi shumaq cuidamarqayki, Tayta Dios. Kachariykamaptikimi isanqa pasaypa mansariy sarimarqan.

⁸ 8 (9) Tayta Dios, qamtami manakamü. Qamtami ruwakamü.

⁹ 9 (10) Wanuptï ¿ima provëchutaq qampaq kanqa? Pamparaptï ¿imatataq jorqunki? Wanushkunaqa manami alabayäshunkinasu. Ni ali kashqaykitapis manami wilakuyanqanasu.

¹⁰ 10 (11) Tayta Dios, wiyamashpayki kuyapaykalämay. Tayta Dios, imaypis yanapaykalämay.

¹¹ 11 (12) Lakish kaykaptï kushikasimaptikimi kushishna danzäpis. Lütu mödanata jatikunäpa trukanqa fiesta jatipämashkanki.

¹² 12 (13) Saymi salmukunawan alabashayki. Manami imaypis upälakushaqsu. Qamtami imaypis agradëcikushayki.