Salmo 29 - Tayta Diospa Wilakuynin

1a

Salmo 29 (28) Tayta Diospa voznin munayyuq kashqan

1a (1a) David qelqashqan salmu.

¹ 1 (1b) Angilkuna, Tayta Diosta alabayay. Munayyuq kashqanpita alabayay.

² Jutinta joqarir Tayta Diosta alabayay. Munayyuq santu Tayta Diosta adorayay.

³ Tayta Diospa vozninqa lamar jananpitami wiyakämun. Jana pasapitapis bunrurukuynöraqmi parlamun. Lamarpitapis mas munayyuqmi kaykan.

⁴ Tayta Diospa vozninqa mansariypaqmi wiyakämun. Tayta Diospa vozninqa espantaypaqmi kaykan.

⁵ Tayta Diospa vozninqa cedru jachatapis pakisinmi. Líbanucho kaq cedru jachakunatapis chipyaqmi tunisin.

⁶ Tayta Diospa vozninqa Líbano jirkatapis imayka becërrutanömi brincasin. Sirión puntatapis imayka waqraq törutanömi saltasin.

⁷ Tayta Dios parlamuptinqa ninami tamyamun.

⁸ Sunyaq jirkakunatapis suksukyäsinmi. Cades jirkatapis marmaryäsinmi.

⁹ Encina jachakunapa rämankunatapis wimpikäsinmi. Muntikunatapis chipyaqmi saqtan. Templunchömi lapanpis adoraykäyan.

¹⁰ Tayta Diosmi tamyatapis tamyasimun. Tayta Diosmi imayyaqpis rey kaykan.

¹¹ Tayta Diosmi payman yärakuq runakunata yanapan. Bendicionninta churamuptinmi jawkala kawayan.