Salmo 26 - Tayta Diospa Wilakuynin

1a

Salmo 26 (25) Ali runa Tayta Diosta manakushqan

1a (1a) David qelqashqan salmu.

¹ 1 (1b) Jusaynaq kaykashqäta conträkunata tantiyaykasilay, Tayta Dios. Noqaqa munashqaykinömi kawaykä. Imaypis qamlamanmi yärakamü.

² Imano kawashqätapis rikaykalämay. Shonqü alita o mana alita yarpashqantapis musyaykulay.

³ Kuyakuq kashqaykitaqa imaypis yarparaykämi. Saymi munashqaykinöla imaypis kawaykä.

⁴ Lulakuqkunawanqa manami shuntakashkäsu. Ali tukuqkunawanqa manami qorikashkäsu.

⁵ Yaqa runakuna shuntakäyashqanmanqa manami aywäsu. Lutan yarpayyuq runakunawanqa manami kirüpis tinkunsu.

⁶ Jusaynaq karmi maylashno kaykä. Saymi altarniki nawpanmanpis yaykü.

⁷ Saychömi agradëcikushpä qamta alabä. Kushikuypaq rurashqaykikunatami wakintapis wilapä.

⁸ Täkunayki wayikitapis kuyämi, Tayta Dios. Say wayikichömi munayyuq kashqaykita tantiyä.

⁹ Jusalikuqkunatanöqa ama wanuykasilämaysu. Wanusikuqkunatanöqa ama castigaykalämaysu.

¹⁰ Paykunaqa mana alita rurayänalanpaqmi yarpachakuyan. Saynöpis chaskipakuylapami imaykayuqpis rikakuyash.

¹¹ Noqaqa manami jusalikursu kawä. Kuyapämashpayki salvaykalämay, Taytay.

¹² Yanapämaptikimi mansakünasu. Kuyashqayki runakuna shuntakäyashqanchömi qamta alabashayki.