Salmo 25 - Tayta Diospa Wilakuynin

1a

Salmo 25 (24) Yanapänanpaq Tayta Diosta manakushqan

1a (1a) David qelqashqan salmu.

¹ 1 (1b) Tayta Dios, qamtami lapan shonqüwan manakamü.

² Tayta Diosnilä, qamlamanmi yärakamü. Runakuna jamuräyämänanta ama kachapaykulaysu. Conträkuna asipäyämänanta ama munaykulaysu.

³ Qamman yärakamuqkunaqa penqayman churash ama kaykuyäläsunsu. Contrayki sharkuqkuna isanqa penqayman churash kaykuyäläsun.

⁴ Imano kawanäpaqpis nänikita reqiykasilämay, Tayta Dios. Munashqaykino kawanäpaqpis nänikipa pushaykalämay.

⁵ Mana jusalikunäpaq wilakuynikita tantiyaykasilämay. Qamlami salvamaqnï Tayta Dios kaykanki. Imay hörapis qamlamanmi yärakamü.

⁶ Imaypis kuyamashkankimi, Tayta Dios. Kuyamashqaykita ama qonqaykulaysu.

⁷ Maqta kaykar jusalikushqäta yarparaykulaysu. Kuyapäkuq kaykarqa yarparkalämanki ari, Tayta Dios.

⁸ Tayta Diosqa alilata ruraqmi kaykan. Jusalikuqkunata pay munashqanno kawayänanpaqmi ali nänita reqisin.

⁹ Humildi kaqkunatami tantiyasin. Alilata rurayänanpaqmi yachasin.

¹⁰ Rurashqan pactuta y mandamientunkunata cumpliqkunataqa kuyapanmi. Promitishqannölami mana kachaypa yanapan.

¹¹ Pasaypa jusayuqmi kaykä, Tayta Dios. Kuyakuq kashqayki musyakänanpaq perdonaykalämay.

¹² Tayta Diosta mansapakuqkunataqa kikinmi tantiyasin shumaq kawayänanpaq.

¹³ Paykunamanmi bendicionninta imaypis churamun. Paykunapita miraqkunatami posisiontapis aypun.

¹⁴ Tayta Diosqa payta mansapakuqkunapa amïgunmi kaykan. Pactuta rurar promitishqannölami bendicionninta kamaripan.

¹⁵ Tayta Dioslatami imaypis manakü. Paymi ima peligrupitapis sapäman.

¹⁶ Pïnïpis mana kaptinmi fiyupa lakish kaykä, Taytay. Nakashqäta rikar kuyapaykalämay.

¹⁷ Waran waranmi shonqü fiyupa lakinan. Kay lakikuypita jorqaykalämay.

¹⁸ Pasaypa nakaykashqäta y lakikuykashqäta tantiyaykulay. Jusäkunapita perdonaykalämay.

¹⁹ Conträkuna saysikami kaykäyan, Taytay. Wanuyparaq chikiyämashqanta rikaykulay.

²⁰ ¡Say runakunapita salvaykalämay! ¡Paykunapita sapaykalämay! Qamlamanmi yärakamü, Taytay.

²¹ Qamman yärakurmi alilata ruraykä. Munashqaykino kawaykaptïqa sapaykalämay.

²² Tayta Dios, contrankunapita Israel runakunata salvaykulay.