Salmo 22 - Tayta Diospa Wilakuynin

1

Salmo 22 (21) Seqaypa lakikurpis Tayta Diosta alabashqan

1 (1) Cantaqkunapa mandaqninpaqmi. Tutapa yarqamuq luychu niyashqan cantupa tönunwan kay salmuta cantayanki. David qelqashqan salmu.

¹ 1 (2) Tayta Dios, Tayta Dios, ¿imanirtaq kachariykamashkanki? Ay, ¿imanirtaq salvaykalämankisu? ¿Imanirtaq lakikur manakamuptïpis wiyaykalämankisu?

² 2 (3) Tayta Dios, junaqpa manakamuptïpis yanapämankinataqku. Sakaypa manakamurpis manami jawka kawayta tarïsu.

³ 3 (4) Imano kaptinpis qamqa santumi kaykanki. Qamqa reymi kanki. Qamtami Israel runakuna alabayäshunki.

⁴ 4 (5) Unay Israel mayïkunapis qammanmi yärakayämurqan. Yärakayämuptinmi imapitapis salvarqayki.

⁵ 5 (6) Manakayämushuptikimi yanaparqayki. Qamman yärakamuq kaqtaqa manami kachaykurqaykisu.

⁶ 6 (7) Sayno kaptinpis kurunöla karmi mana cuentash kaykä. Marka mayïkunapis asipäyämashpan manakaqmanmi churayäman.

⁷ 7 (8) Rikamaqkunaqa kushipäyämashpanmi asikuyan. Umantapis awirraqmi niyan:

⁸ 8 (9) << nirqanchä. Yärakuptinqa salvasun ari. Rasunpaypa kuyaparqa mä, yanapänanpaq shamusun ari>>.

⁹ 9 (10) Sayno niyaptinpis qam munaptikimi yurishkä. Mamäpa melqaynincho jawka kanäpaqpis qammi yanapämashkanki.

¹⁰ 10 (11) Manaraqpis yuriptïmi rikamarqayki. Mamäpa pachancho kashqäpita pasami Diosnï kaykanki.

¹¹ 11 (12) Ama kachaykalämaysu, Taytay. Pasaypa laquësachömi kaykä. Kachaykamaptikiqa ¡piraqchi yanapämanqa!

¹² 12 (13) Chikimaqnïkunami waqraq törukunanöraq tumapaykäyäman. Paykunaqa imayka Basáncho kaykaq kalpasapa törukunanömi kaykäyan.

¹³ 13 (14) Mikukuq leonkunanöraqmi qaparaykäyan. Jatunta äyakurkurmi noqaman cörriyämun.

¹⁴ 14 (15) Saymi yaku jichar ushakashqanno kalpäpis ushakash. Tulükunapis pasaypami qotukaykan. Shonqüpis suluykaq cëranömi ushakaykan.

¹⁵ 15 (16) Shimïpis kankakayparaqmi sakiykan. Qallüpis pasaypa sakirmi watakaykan. Wanushtanömi alpacho kachariykamashkanki.

¹⁶ 16 (17) Conträkunami kanikuq alqukunanöraq sapaypa sapaykäyäman. Makïtapis chakïtapis rachirmi ushaykayämash.

¹⁷ 17 (18) Tulükunapis pasaypami yupanakuykäyan. Kushipämarmi rikapaykäyäman.

¹⁸ 18 (19) Mödanätapis rakipänakuyashqami. Mayqanpis apakunanpaqmi suertita jitayash.

¹⁹ 19 (20) Tayta Diosnilä, ama ari kachaykalämaysu. Qammi valorta qomanki. Shamur jukla salvaykalämay.

²⁰ 20 (21) Runakuna wanusimänanpita sapaykalämay. Say alqukunapa makinpita salvaykalämay.

²¹ 21 (22) Say leonkunapita washaykalämay. Say waqraq törukunapitapis qeshpiykasilämay.

²² 22 (23) Salvakuq kashqaykipitami wawqïkunata wilapäshaq. Paykunawan shuntakaykurmi alabashayki.

²³ 23 (24) Tayta Diosta mansapakuqkuna, payta alabayay. Jacobpita miraqkuna, payta adorayay. Israelpita miraqkuna, payta respitayay.

²⁴ 24 (25) Tayta Diosqa nakaycho kaqkunata kuyapanmi. Mana qonqaypami paykunata yanapan. Manakuyaptinqa wiyanmi.

²⁵ 25 (26) Runakuna shuntakäyashqanchömi alabashayki. Mansapakushuqnikikunapa rikananchömi promitishqäkunata cumplishaq.

²⁶ 26 (27) Muchuqkuna pacha juntami kayanqa. Tayta Diosta ashiqkunaqa paytami alabayanqa. Paykuna imayyaqpis kushishlami kawayanqa.

²⁷ 27 (28) May nacionpita karpis Tayta Diosmanmi yärakuyanqa. Mayqan ayllupita karpis nawpanman qonqurpakuykurmi adorayanqa.

²⁸ 28 (29) ¡Tayta Diosmi mandamaqninsi rey kaykan! ¡Paypa munayninchömi lapan nacionkunapis kaykan!

²⁹ 29 (30) Saymi munayyuq runakuna kushikur adorayanqa. Lapan runakunapis wanuyänanpaq kashqanta tantiyakurmi nawpanman qonqurpakuyanqa.

³⁰ 30 (31) Surinsikunapis Tayta Diostami sirviyanqa. Paypitami imayyaqpis wilakuyanqa.

³¹ 31 (32) Alilata rurar kashqantami qepa yuriqkunatapis wilapäyanqa. Lapantapis cumplishqantami wilapäyanqa.