Salmo 20 - Tayta Diospa Wilakuynin

1

Salmo 20 (19) Reyta yanapänanpaq Tayta Diosta manakushqan

1 (1) Cantaqkunapa mandaqninpaqmi. David qelqashqan salmu.

¹ 1 (2) Nakashqayki höra ruwakuptiki Tayta Dios yanapaykuläshunki. Jacob yärakushqan Tayta Dios sapaykuläshunki.

² 2 (3) Sióncho kaykaq templunpita pasa yanapaykuläshunki.

³ 3 (4) Paypaq ofrendata apashqaykita yarpaykuläsun. Sacrificiuta altarcho rupasishqaykitapis chaskiykuläsun. Selah

⁴ 4 (5) Shonquyki munashqanno kaykuläsun. Imata ruranaykipaq yarpashqaykitapis kamakaykasiläsun.

⁵ 5 (6) Contraykikunata vincishqaykita wiyar kushikushun. Tayta Diosninsipa jutincho bandërakunatapis kushish jawishun. Manakushqaykitapis Tayta Dios chaskiykuläshunki.

⁶ 6 (7) Musyämi akrashqan reyta Tayta Dios yanapänanpaq kashqanta. Paymi santu ciëlupita pasa manakushqanta wiyanqa. Munayninwanmi contrankunata vincinanpaqpis yanapanqa.

⁷ 7 (8) Wakinqa guërra carrëtankunamanmi yärakuyan. Wakinnami cawallunkunaman yärakuyan. Noqansimi isanqa Tayta Diosnilansiman imaypis yärakunsi.

⁸ 8 (9) Cawallunkunaman yärakuqkunataqa contrankunami pasaypa ushakäsiyanqa. Noqansitami isanqa pipis ichipämäshunsu.

⁹ 9 (10) Tayta Dios, contrankunata vincinanpaq reyta yanapaykulay. Yanapäyämänaykipaq manakayämuptï wiyaykayälämay.