Salmo 19 - Tayta Diospa Wilakuynin

1

Salmo 19 (18) Kamashqankunawan y palabranwan Tayta Dios musyasimansi

1 (1) Cantaqkunapa mandaqninpaqmi. Kay salmuqa David qelqashqanmi.

¹ 1 (2) Jana pasami wilakuykan Tayta Dios munayyuq kashqanta. Azulyaraykaqmi musyasimansi Tayta Dios lapanta kamashqanta.

² 2 (3) Junaqpapis waran waranmi musyasimansi. Sakaypapis cada paqasmi tantiyasimansi.

³ 3 (4) Manami runa parlashqannösu parlan ni parlashqanpis manami wiyakansu.

⁴ 4 (5) Sayno kaptinpis wilakuyninqa maysaychömi musyakaykan. Palabrankunaqa pasa kuchunyaqmi chaykan. Inti täkunantapis Tayta Diosmi kamash.

⁵ 5 (6) Saypitami sayraq majasakash maqtano inti kushish yarqamun. Ali cörriq maqtanömi kushish aywan.

⁶ 6 (7) Jana pasapa jukaq kuchunpita jeqarkamur jukaq kuchunpanami jeqarpun. Shanayninpita imapis manami qeshpinsu.

⁷ 7 (8) Tayta Diospa leyninkuna kikin Diospita karmi imaypis mushuq kawayman churamansi. Tayta Diospa palabran yärakuypaq karmi yachayta qomansi.

⁸ 8 (9) Tayta Diospa yachasikuyninkuna ali karmi shonqunsita kushikasin. Tayta Diospa mandamientunkuna püru karmi shakyäsimansi.

⁹ 9 (10) Tayta Diosta mansapakunansipaq tantiyasimashqansikuna limpiu karmi imaypis ushakansu. Tayta Dios nishqankuna rasunpa karmi pay munashqannöla kaykan.

¹⁰ 10 (11) Alinnin qoripitapis mas munapaypaqmi kaykan. Abëjapa mishkinpitapis masmi mishkin.

¹¹ 11 (12) Mana jusalikunanpaqmi leynikikunawan sirvishuqnikita tantiyasinki. Nishqaykikunata cumplirqa bendicionnikitami chaskinqa.

¹² 12 (13) ¿Piraq tantiyanman imanir jusalikushqantapis? Pakaylapa jusalikushqäpita perdonaykalämay.

¹³ 13 (14) Musyaykar mana jusalikunäpaq sapaykalämay. Shonqü munashqanta mana ruranäpaq yanapaykalämay. Saynöpami munashqaykino kawashpä imatapis contraykita rurashaqsu.

¹⁴ 14 (15) Shimï parlashqankunapis y shonqü yarpashqankunapis munashqaykino kaykuläsun, Tayta Dios. Qammi sapämaqnï y salvamaqnï kaykanki.