Salmo 18 - Tayta Diospa Wilakuynin

1-2a

Salmo 18 (17) Chikiqninkunapita salvaptin Tayta Diosta alabashqan

1-2a (1-2a) Cantaqkunapa mandaqninpaqmi. Tayta Diospa sirviqnin David qelqashqan salmu. Saúlpita y lapan contrankunapita salvaptinmi Tayta Diosta David kay salmuta cantar alabarqan.

¹ 1 (2b) Tayta Dios, lapan shonqüwanmi qamta kuyä. Qammi valorta qomanki.

² 2 (3) Tayta Diosqa sapämaqnï qaqami kaykan. Pakakunä y salvamaqnïmi kaykan. Pay japalanmi Diosnï kaykan. Amparakunä qaqami kaykan. Paymanmi yärakü. Escüdü karmi sapäman. Munayyuq karmi imaypis salvaman. Payqa altunnincho pakakunä machaymi kaykan.

³ 3 (4) Tayta Diostami imaypis alabaläshaq. Manakuptï conträkunapita imaypis salvamanmi.

⁴ 4 (5) Runata prësu sariykur liyaqnömi wanuypis janächöna karqan. Imaykatapis apaq juchunömi ushakäsimänanpaq karqan.

⁵ 5 (6) Wanuypis läzunwanmi watamarqan. Ushakäsikuq trampatami churapämarqan.

⁶ 6 (7) Wanunäpaqna kashqäta yarparmi Tayta Diosta manakurqä. Yanapämänanpaqmi Diosnïta ruwakurqä. Ruwakuptïmi templunpita pasa wiyamarqan. Seqaypa lakikur manakushqätami wiyamarqan.

⁷ 7 (8) Pasapis fiyupami kuyurqan. Jirkakunapa cimientunpis suksukyäyarqanmi. Tayta Dios rabyakuptinmi lapanpis marmaryäyarqan.

⁸ 8 (9) Senqanpitami qoshtaypis yarqamurqan. Shiminpitami ninapis yarqamurqan. Arquykaq shanshatapis aqtumurqanmi.

⁹ 9 (10) Ciëlu punkuta kichaskir kikinmi urämurqan. Chakin jawanchöpis yana pukutaymi karqan.

¹⁰ 10 (11) Querubín angilnin loqashqami pajamurqan. Wayra jananchömi cörrila shamurqan.

¹¹ 11 (12) Paypa pakakunanqa yana chiklu sakaymi karqan. Yanawyaykaq pukutaymi payta sapakurkurqan.

¹² 12 (13) Elqukuyno chipipiylami nawpanpita yarqamurqan. Runtu tamyawan tillaykaq shanshalami tamyamurqan.

¹³ 13 (14) Tayta Dios jana pasapita parlamushqanqa maqakuynömi wiyakämurqan. Ciëlupitami poderyuq Diospa vozninpis wiyakämurqan. Runtu tamyawan tillaykaq shansha chawpinpitami parlamurqan.

¹⁴ 14 (15) Elquyninta flëchatanöraq jitamuptinmi conträkuna qeshpir wakpa kaypa aywakuyarqan.

¹⁵ 15 (16) Tayta Dios olqutupämuptinmi lamar rurinpis alayri rikakarqan. Rabyar pükamuptinmi kay pasata tuknaraqkunapis rikakäyarqan.

¹⁶ 16 (17) Jana pasapitami Tayta Dios jancharkamarqan. Lamar rurincho talpukashno kaykaptïmi makinwan jorqarkamarqan.

¹⁷ 17 (18) Munayyuq conträkunapa makinpitami jorqamarqan. Noqapita mas poderösu kayaptinpis paymi salvamarqan.

¹⁸ 18 (19) Pasaypa desgraciacho kaykaptïmi conträkuna atacayämarqan. Sayno kaykaptïmi Tayta Dios yanapämarqan.

¹⁹ 19 (20) Yanapämarmi aliman churamarqan. Kuyamashpanmi salvamarqan.

²⁰ 20 (21) Munashqanno kawaptïmi jorqamarqan. Alilata ruraq kaptïmi salvamarqan.

²¹ 21 (22) Tayta Dios munashqannölami imaypis kawaykä. Mana jusalikuypami payta imaypis qatiraykä.

²² 22 (23) Nishqankunataqa lapantami yarparaykä. Estatütunkunataqa imaypis cumpliykämi.

²³ 23 (24) Noqaqa pay munashqannömi kawashkä. Lutan ruraykunapitapis witikushkämi.

²⁴ 24 (25) Alilata ruraq kaptïmi imaykapitapis Tayta Dios sapämash. Jusaynaq kashqäta musyarmi yanapämash.

²⁵ 25 (26) Tayta Dios, kuyapäkuqkunataqa kuyapankimi. Alilata ruraqkunataqa yanapankimi.

²⁶ 26 (27) Ali kawaqkunataqa alimi rikaykanki. Trampösu kaqkunatami isanqa castigaykanki.

²⁷ 27 (28) Humildikunataqa salvaykankimi. Runa tukuqkunatami isanqa manakaqman churaykanki.

²⁸ 28 (29) Tayta Diosnilä, noqapaq aksinömi kaykanki. Sakäpakushno kaptïpis qammi tantiyasimanki.

²⁹ 29 (30) Yanapämaptikimi aska soldädukunatapis qokachärishaq. Marka murällan altu kaptinpis achpaypami yaykushaq.

³⁰ 30 (31) Tayta Dios munashqanno kawayqa imaypis alimi kaykan. Lapan promitishqantapis payqa cumplinmi. Payman yärakuqkunataqa escüdunömi sapan.

³¹ 31 (32) Tayta Diospita mas juk Diosqa manami kansu. Tayta Diosninsinöqa manami pipis sapämansisu.

³² 32 (33) Tayta Dios kikinmi kalpatapis qoman. Pay pusharämaptinmi munashqanno ali kawä.

³³ 33 (34) Pay yanapämaptinmi luychunöraq wayrala aywä. Jirkakunapa purirpis mana luskakaypami purï.

³⁴ 34 (35) Guërracho ali pelyaq kanäpaqpis paymi yachasiman. Bronci flëchata wimpisinäpaqpis paymi kalpata qoman.

³⁵ 35 (36) Qammi escüdü kar imapitapis sapämar salvamashkanki. Aluq kaq makikiwanmi sararämashkanki. Kuyapämarmi lapanchöpis yanapämashkanki.

³⁶ 36 (37) Qammi shumaq tantiyasimashkanki maypa aywarpis munashqaykino kawanäpaq.

³⁷ 37 (38) Chikimaqnïkunatapis qati qatiykurmi ushakäsishkä. Lapanta wanuykasirraqmi jamaykushkä.

³⁸ 38 (39) Paykunata chipyaqmi ushashkä. Vincishpämi majaypa majar ushashkä. Manami paykuna yapay conträ sharkuyashnasu.

³⁹ 39 (40) Qammi guërracho pelyanäpaq kalpata qomashkanki. Conträkunatami munaynïman churamushkanki.

⁴⁰ 40 (41) Vincinäpaq yanapämaptikimi kunkapita jarushkä. Saynöpami chikimaqnïkunata lapanta ushakäsishkä.

⁴¹ 41 (42) Paykunataqa qayakuyaptinpis manami pipis yanapashsu. Tayta Diosta manakuyaptinpis manami cäsushsu.

⁴² 42 (43) Polvuta wayra apar elaqäsishqannömi paykunataqa elaqäsishkä. Mituta cällicho lanquypa lanqushqansinömi paykunataqa ushashkä.

⁴³ 43 (44) Israel nacioncho conträ sharkuyaptinpis qammi salvamashkanki. Juk nacionkunapa mandaqnin kanäpaqmi churamashkanki. Jäpa runakunami kanan sirviykäyäman.

⁴⁴ 44 (45) Juklä nación runakunapis munaynïchömi kaykäyan. Imatapis rurayänanpaq niptïqa paykuna juklami rurayan.

⁴⁵ 45 (46) Say jäpa runakunaqa mansayämanmi. Qayaptïpis pakaräyashqanpita suksukyaykarmi yarqayämun.

⁴⁶ 46 (47) ¡Alabash kaykuläsun Tayta Dios! ¡Alabash kaykuläsun sapämaqnï! ¡Alabash kaykuläsun salvamaqnï Tayta Dios!

⁴⁷ 47 (48) Conträ sharkuqkunata qammi castigashkanki. Lapan nación runakunatapis munaynïmanmi churamushkanki.

⁴⁸ 48 (49) Qammi chikimaqnïkunapita salvamashkanki. Conträ sharkuqkunapita libramashkanki. Wanusikuq runakunapitapis sapämashkankimi.

⁴⁹ 49 (50) Saymi may nacioncho karpis adorashayki. Lapan shonqüwan cantarmi alabashayki.

⁵⁰ 50 (51) Akrashqayki reyta lapanchömi yanapaykanki. Davidta y paypita miraqkunatami imaypis kuyapaykanki.