Salmo 17 - Tayta Diospa Wilakuynin

1a

Salmo 17 (16) Chikiqninkunapita salvananpaq manakushqan

1a (1a) Kay salmuqa Tayta Diosta David manakushqanmi kaykan.

¹ 1 (1b) Tayta Dios, manakamushqäta wiyaykalämay. Qayakamushqäta chaskiykalämay. Ruwakamushqäta wiyaykalämay. Lapan shonqüwanmi qamta manakamü.

² Qam musyankimi imano kashqätapis. Saymi manakamü favornï sharkuykunaykipaq.

³ Junaqpapis sakaypapis shonqü imata yarpashqantapis musyaykankimi. Jusäkunata ashirpis manami tarishkankisu. Manami imaypis lutankunata parlashkäsu.

⁴ Mandamientuykikunata cäsukurmi runakuna lutankunata rurayaptinpis lutankunata rurashkäsu.

⁵ Tantiyasimashqaykinömi imaypis kawashkä. Nishqaykikunata imaypis cäsukushkämi.

⁶ Manakamushqätaqa imaypis wiyaykämankimi, Taytay. Sayta musyarmi imaypis manakamü. Ruwakamushqäta wiyar yanapaykalämay.

⁷ Lapan shonqunkunawan yärakamuqtaqa contrankunapita salvankimi. Kuyamashqaykita tantiyanäpaq noqalätapis salvaykalämay.

⁸ Nawi nïñuykitano imapitapis sapaykalämay. Chipshanta ripran rurinman walpa pakashqanno noqatapis pakaykalämay.

⁹ Yaqa runakunapa makinpita sapaykalämay. Conträkuna jiruruypa sapäyämaptinpis salvaykalämay.

¹⁰ Conträ runakunaqa mana kuyapäkuqmi kaykäyan. Runa tukuyashpanmi imatapis parlaykäyan.

¹¹ Maypa aywaptïpis rikaraykäyämanmi. Imatapis jitapäyämänalanpaqmi ashiykäyan.

¹² Leonno pakakuykurmi pitapis wanusiyänanpaq shuyaraykäyan.

¹³ Tayta Dios, say yaqa runakunata castigaykulay. Qonqurninkunatapis tumariykasilay. Espädaykiwan salvaykalämay.

¹⁴ Podernikiwan sapaykalämay. Say runakunata kay pasapita elaqaykasilay. Paykunapa herenciankunaqa kay pasacho kaqkunalami kanqa. Paykunaqa rïcuyarpis jina rïcuyäyäsun. Wamrankunapis empachashqanyaq mikuyäsun. Wilkankunapaqpis pusuy pusuy kasun.

¹⁵ Noqami isanqa nawpaykiman chämushaq. Qamta rikashpämi kushikushaq.