Salmo 149 - Tayta Diospa Wilakuynin

Salmo 149 Tayta Diosta alabashqan

¹ ¡Aleluya! Mushuq alabanzata cantar Tayta Diosta alabayay. Pay munashqanno kawaq runakuna shuntakashqancho alabayay.

² Israel runakuna, kamashuqniki Tayta Diosta alabayay. Sión runakuna, Tayta Dios mandashuqniki rey kashqanpita kushikuyay.

³ Jutinta joqarir danzayay. Arpakunata y panderëtakunata tukapalanpa alabayay.

⁴ Kuyashqan runakunata rikarmi Tayta Dios kushikun. Ali kawayänanpaqmi humildikunata yanapan.

⁵ Tayta Diosman yärakuqkuna, lapayki kushikuyay. Yanapäyäshushqaykipita cämaykikunachöpis cantayay.

⁶ Ishkan waqtanpa ali afilash espädata aptarkur lapan shonquykikunawan Tayta Diosta alabayay.

⁷ Say espädawanmi mana cäsukuq nación runakunata Tayta Dios vincinqa.

⁸ Mandaqnin reykunatapis mandäsiqninkunatapis prësu sariykurmi fiërru cadinawan watanqa.

⁹ Saynöpami paykunapaq qelqarashqanta Tayta Dios cumplinqa. Cumpliptinmi Tayta Diosta sirviqkuna seqaypa kushikuyanqa. ¡Aleluya!