Salmo 148 - Tayta Diospa Wilakuynin

Salmo 148 Tayta Diosta alabashqan

¹ ¡Aleluya! Jana pasacho kaqkuna, Tayta Diosta alabayay.

² Angilkunapis, lapayki alabayay. Guërracho pelyaq angilkunapis, lapayki alabayay.

³ Intipis y killapis, alabayay. Asikyaq qoyllarkunapis, lapayki alabayay.

⁴ Mas altucho kaq ciëlupis, payta alabay. Ciëlu janancho kaykaq yakupis, payta alabay.

⁵ Tayta Dios alabash kaykuläsun. Pay niskilaptinmi lapanpis rurakarqan.

⁶ Tayta Dios kamashqanqa manami ushakanqasu. Pay nishqankunataqa manami pipis trukasinqasu.

⁷ Kay pasacho kaqkuna, Tayta Diosta alabayay. Lamarcho mansariypaq pescädukuna y saycho lapan kaqkunapis, alabayay.

⁸ Maqakuypis, runtu tamyapis, rashtapis y pukutaypis, alabayay. Tayta Dios munashqanta ruraq löcu wayrapis, alabay.

⁹ Puntakunapis, jirkakunapis, frütayuq jachakunapis y cedrukunapis, alabayay.

¹⁰ Ashmana kaq y mana ashmana kaq uywakunapis, lätaypa puriqkunapis y pishqukunapis, alabayay.

¹¹ Kay pasacho reykunapis, lapan nacioncho taq runakunapis, munayyuq runakunapis y autoridäkunapis, alabayay.

¹² Maqtakunapis, jipashkunapis, awkinkunapis, wamrakunapis,

¹³ Tayta Diosta alabayay. Paymanqa manami pipis tinkunsu. Kay pasacho kaqkunapitapis y jana pasacho kaqkunapitapis mas munayyuqmi kaykan.

¹⁴ Paymi kuyashqan runakunata imaypis yanapan. Pay munashqanno kawaq Israel runakuna, lapayki alabaykuyälay. ¡Aleluya!